Komunidade Maununu aprezenta preokupasaun irrigasaun aat ba komisaun D
DILI, 17 jullu 2024 (TATOLI)—Parlamentu Nasionál (PN), liuhusi Komisaun D ne’ebé trata asuntu Ekonomia no Dezenvolvimentu, semana kotuk hala’o atividade fisklalizasaun iha munisípiu Ainaro.
Atividade fiskalizasaun ne’ebé lidera husi Prezidente Komisaun D, Deputadu Ricardo Baptista no akompañadu husi membru komisaun ne’e hahú ho reuniaun ho autoridade lokál no diretór sira serbisu munisipál nian liga ba área agrikultura, kooperativa, ambiente no área relevante sira seluk.
Ida-ne’e atu hetan informasaun no relatóriu serbisu kona-ba ezekusaun orsamentu no programa 2023 no 2024 inklui dezáfiu no progresu sira-ne’ebé iha, nune’e komisaun D bele halo rekomendasaun ba Governu hodi mellora iha tinan tuir mai, tuir papel Deputadu sira-nian.
Hafoin reuniaun, ekipa komisaun D, kontinua halo fiskalizasaun iha terrenu hodi haree diretamente situasaun reál ne’ebé enfrenta husi komunidade sira, hanesan atividade kooperativa sira, irigasaun iha Ainaro Vila, Maununu, Hatudo no Casa.
“Iha oportunidade ne’e, aleinde ko’alia kona-ba área temátika komisaun nian, xefe suku Maununu mós reprezenta nia komunidade hodi hato’o preokupasaun liga ba irrigasaun ne’ebé aat,” refere relatóriu fiskalizasaun komisaun D ne’ebé Agência Tatoli asesu, kuarta ne’e.
Aleinde ne’e, autoridade lokál aprezenta mós falta ekipamentu no pesoál saúde ho profesór sira iha suku Maununu, tanba ne’e rekomenda ba Deputadu sira bele hato’o preokupasaun sira-ne’e ba Governu hodi rezolve.
Entretantu, husi fiskalizasaun ne’e, komisaun sei halo relatóriu hodi aprezenta iha reuniaun plenária no halo distribuisaun kópia ba Governu liuhusi ministériu tutela hodi bele tau atensaun.
Antes ne’e mós, deputadu sira liuhusi reuniaun plenária Parlamentu kontinua levanta hodi husu Governu liuhusi ministériu kompetente atu fó prioridade hodi halo konstrusaun irrigasaun no halo reabilitasaun ba irrigasaun ezistente iha territóriu, nune’e fasilita povu agrikultór sira hodi bele hasa’e produsaun iha rai-laran.
Jornalista : Nelson de Sousa
Editór : Cancio Ximenes
