DILI, 17 jullu 2024 (TATOLI)–Prezidente Autoridade Munisipiu Liquiça, Paulino Ribeiro, hateten Programa Nasionál Dezenvolvimentu Suku (PNDS) Liquiça implementa projetu hamutuk 24 ne’ebé la’o hela iha tinan ne’e.
Paulino Ribeiro hateten projetu sira ne’e barak liu ba iha infraestrutura fízika edukasaun, saúde, barajen ba mota, konstrusaun estrada no klinika.
Projetu PNDS ne’e iha nia orsamentu hamutuk millaun $1,3 ba projetu reabilitasaun no konstrusaun ba infraestrutura bázika sira.
“Orsamentu ba PNDS nian ne’e nia ezekusaun kiik, Ita foin hahú jalo lansamentu, entaun ita foin ezekuta 10%,” Prezidente Autoridade Munisipiu Liquiça, Paulino Ribeiro, hateten ba Agênxia Tatoli, hafoin hala’o enkontru ho Ministru Administrasaun Estatál, Tomas do Rosário Cabral, iha Bebora.
Prezidente munisipal ne’e garante, maske ezekusaun sei kiik maibé PNDS munisipiu Liquiça sei termina projetu no ezekuta hotu orsamentu ba iha 2024 nian iha tinan ida-ne’e nia rohan.
Jornalista : Jesuína Xavier
Editór : Cancio Ximenes
