PNTL no F-FDTL formaliza operasaun konjunta “Pombu Mutin” ba vizita Papa Francisco

DILI, 17 Jullu 2024 (TATOLI) – FALINTIL-Forsa Defeza Timor-Leste (F-FDTL) no Polísia Nasionál Timor-Leste (PNTL) formaliza ona akordu operasaun konjunta ho naran “Pombu Mutin” hodi garante seguransa ba vizita Papa Francisco iha país, entre loron 09 no 11 Setembru.

Xefe Estadu-Maiór Jenerál F-FDTL, Tenente-Jenerál Falur Rate Laek, informa katak akordu operasaun konjunta ne’ebé ohin instituisaun defeza no seguransa formaliza ne’e atu hala’o serbisu hodi fó seguransa iha territóriu, espesialmente iha Dili ba vizita Papa Francisco nian.

“Ita hanaran operasaun konjunta“Pombu Mutin” ne’e ho sentidu atu operasaun ne’e bele lori pás no hakmatek ba ita hotu atu labele iha problema. Halulik tiha ita hotu atu labele halo violénsia ba malu iha eventu vizita Papa nian”, Tenente-Jenerál hateten iha Kuartél Jerál PNTL, Caicoli, ohin.

Xefe Estadu ne’e salienta katak operasaun konjunta ne’e foin maka formaliza, maibé serbisu apoiu seguransa ba pás no estabilidade iha Timor-Leste ne’e instituisaun rua halo antes ona. Hodi hatutan katak atividade preparativu sira iha munisípiu hotu la’o tiha ona dezde uluk. “Ne’e serbisu ida kompleksu tebes, konta ho serbisu operasaun konjunta ne’e konsidera boot tebes ne’ebé sei hakerek istória Timor-Leste nian. Hanesan instituisaun ne’ebé apoia ba defeza no seguransa kontinua hala’o nia papél hanesan baibain no laiha buat foun ida ba instituisaun rua ne’e”, dehan.

Falur Rate Laek adianta katak iha serbisu operasaun konjunta ne’e define ona regra ne’ebé presiza orienta ba sidadaun hotu iha territóriu tenke kontribui ba seguransa atu lori susesu ba ema hotu no progresu ba nasaun Timor-Leste.

“Ha’u husu ba sidadaun hotu atu kumpre ba saida maka parte seguransa halo ona iha sosiedade nia leet. Buka atu ajuda liután PNTL no F-FDTL iha parte seguransa nian atu ita bele simu vizita Papa mai ita -ia rain ne’e ho susesu”, nia apela.

Xefe Estadu-Maiór salienta katak patrullamentu kada loron no kalan sei kontinua la’o no operasaun konjunta ne’e sei la taka dalan atu la’o hamutuk no bele mós la’o tuir unidade idaidak nian bainhira iha desizaun ruma maka sei hamutuk hodi reforsa liután serbisu defeza no seguransa nian.

Iha fatin hanesan, Komandante Jerál Polísia Nasionál Timor-Leste, Komisáriu Jerál Polísia Henrique da Costa, adianta katak membru efetivu sira iha PNTL hahú husi nasionál to’o munisípiu sira sei uza hotu ho másimu, nune’e bele responde ba serbisu operasaun konjunta atu asegura vizita amu Papa nian.

“Operasaun ida ne’e kategoria boot, tanba iha eventu vizita Papa Francisco nian, ne’ebé sei envolve sarani barak, inklui sidadaun sira husi estranjeiru. Tanba ne’e, presiza atu garante seguransa ida di’ak no metin liu mak PNTL no F-FDTL hamutuk ona hodi formaliza akordu operasaun”, realsa.

Iha akordu operasaun konjunta ne’e iha ona orden serbisu ba komandante Polísia sira iha kada munisípiu atu koopera ho amu párokus no Prezidente Autoridade Munisipál sira, nune’e bele akompaña sarani sira husi kada munisípiu to’o iha fatin destinadu ne’ebé komisaun sira prepara ona.

“Ida ne’e responsabilidade komandante idaidak nian iha kada munisípiu, nune’e bele akompaña di’ak liután movimentu sarani sira-nia. Ha’u husu ba sarani sira atu mantein amizade hodi bele selebra loron importante ida ne’e ho kontente no ho pás ba timoroan hotu”, nia konklui.

Jornalista: Tomé Amado

Editora: Maria Auxiliadora