DILI, 17 jullu 2024 (TATOLI) – Prezidente Repúblika, José Ramos Horta, kuarta kalan ne’e, iha eskritóriu WFP Dili, kondekora Medalla Méritu prestijiozu ba Alba Cecilia Garzon, Reprezentante Nasionál husi Programa Alimentár Mundiál iha Timor-Leste.
“Medalla Méritu ne’e rekoñese kontribuisaun exepsionál ba Garzon nian ba dezenvolvimentu Timor-Leste, liuliu iha área seguransa ai-han, nutrisaun, no protesaun sosiál,” tenik Xefe Estadu iha nota ne’ebé Agência TATOLI asesu husi media Palásiu Prezidensiál.
Ho karreira distinta liu dékada tolu iha kontinente oioin, Garzon kaer ona pozisaun xave iha Afeganistaun, Paquistaun, Malawi, no nasaun oioin iha América Latina no África, ne’ebé nia jere resposta umanitária kompleksu no implementa inisiativa dezenvolvimentu sustentável.
Nu’udar Reprezentante Nasionál WFP iha Timor-Leste, Garzon tau ona organizasaun ne’e nu’udar parseiru importante iha inisiativa governamentál no dezenvolvimentu, lidera programa inovadór ne’ebé krusiál ba progresu nasaun nian.
Durante nia mandatu iha Timor-Leste, esforsu hametin parseria entre Timor-Leste no Programa Alimentár Mundiál.
“Garzon nia servisu exemplifika espíritu kooperasaun internasionál no dedikasaun atu hadi’a sidadaun sira-nia moris,” refer nota ne’e.
Xefe Estadu espresa gratidaun profunda ba Garzon ba ninia serbisu no kompromisu ne’ebé metin atu hamenus inseguransa ai-han no hasa’e rezultadu nutrisaun iha Timor-Leste.
Rekoñesimentu ida-ne’e hatudu parseria ne’ebé folin-boot entre Timor-Leste no Programa Alimentár Mundiál.
Jornalista: Hortencio Sanchez
Editór: Florencio Miranda Ximenes
