DILI, 18 jullu 2024 (TATOLI) – Diretór Servisu Saúde Munisípiu Dili, Mateus Pinto, hateten Governu sei la autoriza profisionál saúde fahe ai-moruk been iha plástiku ki’ik hodi fó ba pasiente sira.
“Akontesimentu ne’e iha Hera iha semana kotuk, entaun ami-nia ekipa ida tun direta ba postu saúde Hera, identifika fahe ai-moruk been iha plástiku ne’e, akontese duni iha postu saúde refere, tanba ne’e Governu deside ona katak ba oin sei la permite asaun hanesan ne’e akontese tán ba pasiente sira”, Mateus Pinto inform aba jornalista sira iha nia kna’ar fatin Formoza ohin.
Nia esplika, ho situasaun ne’e, vise ministru fó samada kedas ba diretór servisu saúde munisípiu Dili atu ai-moruk saida de’it labele tau ba plástiku hodi fó ba pasiente sira.
“Iha momentu ne’e, vise ministru saúde bolu kedas ha’u katak kualker ai-moruk xarope ne’e la bele tau iha plástiku hodi fó ba povu, tanba ita-nia povu iha dignidade mezmu ke ai-moruk iha ka laiha ne’e kestaun Governu nian, ita pesoál saúde servisu iha ne’ebá, ita-nia povu la’ós kioske, ita haknauk fali hanesan sasan fó ba povu ne’e dignidade iha ne’ebé. Se ba oin mak sira kontinua mak tenke responsabiliza sira-nia aktu ne’e”, nia afirma.
Nia apela ba xefe sentru saúde sira iha postu saúde hotu atu labele halo tán ida-ne’e, sira la admite kualker saida de’it fó ba povu. Hakarak fó, bele fó ai-moruk tomak iha nia fatin bainhira la nesesáriu, profesionál saúde bele esplika ba pasiente.
“Momentu ne’e razaun katak labarik sira mai simu vasina tanba ne’e buat ida moras ne’e asidente de’it iha daun fatin ne’e mak dalaruma moras isin manas. Tanba ne’e mai isin manas fó tomak ba, tanba ita lahatene plástiku ne’e moos ka lae, se plástiku ne’e la moos depois ba aumenta tán problema ba pasiente sira”, nia esplika.
Nia esplika, ai-moruk musan mak tau iha plástiku ne’e di’ak maibé xarope mak fui hodi fahe ne’e la admite.
“Ai-moruk musan ne’e kestaun ketak, maibé se xarope mak fui fahe ne’e ita la permite. Tanba ne’e ami rezolve ona, oinsá profesionál saúde sira aseita ida-ne’e, nune’e ba oin sei la akontese tán ida-ne’e, se ba oin mak akontese mak idaidak responsabiliza tanba desizaun ita fó ona, ita labele halimar demais, se lae buat hotu dehan la di’ak de’it”, nia dehan.
Iha fatin hanesan, Diretór Institutu Nasionál Farmásia no Produtu Médiku (INFPM), Crizanto Monteiro, hateten distribuisaun ai-moruk ba sentru saúde hotu la’o nafatin no INFPM la permite ona saúde sentru sira no postu saúde sira atu fornese xarope paracetamol, konteúdu iha embalajen plástiku hodi fahe ba pasiente sira.
“Iha ligasaun ho informasaun ne’ebé oras ne’e sirkula, iha Sentru Saúde Komunitária Hera, distribui tiha xarope parcetamol hafoin ense iha plástiku no fó ba pasiente sira. Tanba xarope paracetamol iha INFPM adekuadu no prontu atu distribui, nusa mak sira bele halo fali nune’e”, Crizanto Monteiro konklui.
Jornalista : Felicidade Ximenes
Editór : Zezito Silva
