Top

Governu tenke submete proposta-Lei OJE 2025 ba PN iha 01 outubru

Prezidente Komisaun C, Cedelízia Faria dos Santo. Imajen Tatoli/Francisco Sony.

DILI, 18 jullu 2024 (TATOLI)—Prezidente Komisaun C ne’ebé trata asuntu Finansa Públika iha Parlamentu Nasionál (PN), Cedelízia Farria dos Santos, hateten tuir Lei Enkuadramentu Orsamentál (LEO) ne’e Governu tenke submete ona proposta-lei Orsamentu Jerál Estadu (OJE) ba tinan 2025 ba PN iha loron 01 fulan-outubru .

“Iha 01 outubru, hakarak ka lakohi, Governu tenke submete ona orsamentu mai Parlamentu Nasionál,” Prezidente Komisaun C ne’e hateten ba Agência Tatoli iha resintu PN, kinta ne’e.

Nia hateten, husi ida-ne’e mak komisaun C sei fó sai kalendáriu audiénsia no sei haruka ba Prezidente Parlamentu Nasionál atu aprova, hafoin halo kontaktu ho membru Governu sira hodi bele mai halo audiénsia iha PN.

Hoirsehik Governu liuhusi reuniaun Konsellu Ministru aprova ona tetu OJE 2025 biliaun $1,8 bele submete mai PN ho karáter normál.

“Ita espera, ne’e bele la to’o natal. Tanba, orsamentu ne’e tama, ita seidauk haree, horisehik aprova ona maibé nia seidauk hatete tama ho pedidu urjénsia ou normal. Maibé, ha’u fiar tanba ida-ne’e tinan daruak ona. Fiar katak sei hatama prosesu pedidu normál la’ós ho urjénsia, entaun nia sei han tempu uitoan,” nia dehan

Enkuantu, iha loron 17 fulan-jullu ne’e, Governu liuhusi reuniaun Konsellu Ministru (KM) delibera hodi aprova montante totál despeza nian ne’ebé relasiona ho títulu orsamentál ida-idak kona-ba Orsamentu Jerál Estadu (OJE) ba tinan 2025, ho valór globál ne’ebé prevee dolár amerikanu biliaun $1,8.

“Montante ne’e inklui orsamentu Administrasaun Sentrál, Seguransa Sosiál no Rejiaun Administrativa Espesiál Oé-Cusse Ambeno (RAEOA),” haktuir nota ne’ebé Agência Tatoli asesu, kinta ne’e.

Distribuisaun tetu agregadu Orsamentu ba Administrasaun Sentrál iha OJE tinan 2025, tuir setór ne’ebé define ona husi programa Governu no Planu Estatéjiku Dezenvolvimentu Nasionál (PEDN) ho Setór Kapitál Sosiál simu alokasaun ho montante 38%, tuir kedas Setór Enkuadramentu Instituisionál ho 36%, Dezenvolvimentu Infraestrutura 16% no Dezenvolvimentu Ekonómiku 10%.

Tetu dezagregadu sira sei distribui ba entidade públika sira iha loron 23 jullu 2024 no sira iha loron 11 hodi elabora sira-nia proposta orsamentál.

Proposta sira-ne’e, sei analiza husi Komité Revizaun Orsamentál husi loron 12 to’o 17 agostu 2024.

Jornalista : Nelson de Sousa

Editór         : Cancio Ximenes  

Publisidade

Leave a Reply

Latest Post

error: Content is protected !!