DILI, 18 jullu 2024 (TATOLI)–Ministériu Administrasaun Estatál (MAE) no Sekretária Estadu Igualdade (SEI) promove forum diálogu nasionál ho tema “Autoridade lokál sai kampiaun ba igualdade jeneru iha suku” hodi valoriza feto no labarik feto, ema ho defiesiénsia no komunidade vulnerável.
“Ho hanoin hirak ne’e mak Sekretaria Estadu Igualdade hanaran imi Kampiaun ba igualdade jéneru. Ema-ne’ebé sai kampiaun ba igualdade jeneru sei inisia atividade sira hodi halakon bareira sira-ne’ebé teri netik feto sira-nia abilidade,” Sekretária Estadu Igualdade, Elvina Sousa Carvalho, hateten iha nia diskursu, iha salaun OKA, Osindo, Hudi-Laran, kinta ne’e,
Kampiaun igualdade jéneru tenke apoia feto hodi hasa’e kapasitasaun iha vida polítika no ekonomia no kria mekanizmu prevensaun violénsia domestika no akompaña vitima sira iha suku.
Nia konsidera forum diálogu sei reforsa servisu hamutuk entre Governu no autoridade lokál sira iha baze.
Iha fatin hanesa, reprezentatante Ministru Administrasaun Estatal (MAE) hosi Sekretáriua Estadu Toponímia no Organizasaun Urbana (AEATOU), Germano Santa Brites, hateten Governu iha kompromisu makaas atu hakbit feto ba igualdade jeneru iha nivel lokal no hasa’e reprezentante feto iha dezenvolvimentu iha nivel suku sira hotu.
Objetivu ida primeiru mak enkoraja no fasilita disukusaun hodi dezafia bareira sira-ne’ebé diskrimina no promove transformasaun ba igualdade no hasa’e reprezentasaun feto iha dezenvolvimentu suku nian.
“Iha objetivu ida-ne’e sei analiza bereira ne’ebé diskrimina feto iha nível suku hanesan kulturál ne’ebé la justu. Ezemplu, feto sira falta asesu ba edukasaun no rekursu ekonomiku,” Sekretáriua Estadu Toponímia no Organizasaun Urbana (AEATOU), Germano Santa Brites, hateten.
Objetivu seluk husi Governu mak inspira xefe suku sira atu kria inisiativa oioin ba promosaun igualdade jeneru no inisiativa prevensaun violénsia bazeia ba jéneru iha suku, enkoraja no hakbiit partisipasaun feto iha dezenvolvimentu suku nian.
Husi objetivu ne’e fornese servisu apoiu ba vitima violénsia bazeia ba jeneru, kampaña sensibilizaun atu muda sosiedade nia atitude ba violénsia bazeia ba jeneru no programa enpoderamentu feto ne’ebé fó ba sira abilidade no rekursu atu sai independente.
Nia hateten, haforasa kolaborasaun entre SEI ho MAE no xefe suku sira nu’udar alvu ida atu alkansa igualdade jéneru liuhosi servisu hamutuk ne’ebé bele hetan rezultadu pozitivu, no lori mudansa no sustentável iha nia sosiedade.
Primeiru-Ministru, Kay Rala Xanana Gusmão, hateten violénsia bazeia ba jéneru kontinua sai problema ba iha sosiedade.
“Violénsia sai problema sosiál, tanba ne’e mak imi tenke tun ba haree sira. Ida-ne’e mak sai kampiaun,” nia hateten.
Tanba ne’e, nia husu xefe suku sira tenke defende justisa, habesik aan ba iha populasaun hodi haree sira-nia kondisaun, ezemplu saúde edukasaun no seluk tan.
Jornalista : Jesuína Xavier
Editór : Cancio Ximenes
