DILI, 18 jullu 2024 (TATOLI)—Deputada CNRT iha Parlamentu Nasionál (PN), Cedelízia Farria dos Santos, husu Eletrisidade Timor-Leste, Empreza Públika (EDTL, E.P) tau atensaun ba eletrisidade mate-lakan iha kapitál Dili, tanba Papa Francisco sei hala’o vizita Estadu no pastorál iha Timor-Leste, iha 09-11 setembru 2024.
“Ha’u hanoin sai preokupasaun ita-nian no preokupasaun Deputadu sira-nian pertinente, tanba ita-nia Amu Papa to’o mai mak ahí mate-lakan, entermu seguransa no Timor nia naran iha mundu mós ladi’ak. Tanba ne’e, dalabarak ami mós husu beibeik iha plenária atu Prezidente EDTL, E.P no Ministru ne’ebé hola parte iha ne’e, tenke hamatan atu ita labele hasoru beibeik problema,” nia hateten ba Agência Tatoli iha resintu PN, kinta ne’e.

Governu aloka osan ba EDTL, E.P ho nia prosesu hotu no lei fó dalan orsamentu ba komvustível no manutensaun mós iha, tanbasá mak eletrisidade iha problema hela de’it.
“EDTL ita halo tiha ona ba empreza públika, ita-nia hanoin ne’e, espetativa problema sira-ne’e labele mosu tan. Agora, se problema ne’e mosu nafatin, hanoin hanesan reprezentante povu husu EDTL, E.P atu tau atensaun makaas, nune’e problema ne’e ba oin labele mosu tan,” nia dehan.
Kestaun la’ós de’it tanba Amu Papa Francisco atu mai vizita Timor-Leste mak fó atensaun ba eletrisidade mate-lakan, maibé ho problema ida-ne’e povu barak nia sasán eletróniku barak mak hetan estragu.
Antes ne’e, liuhusi reuniaun plenária, Deputadu KHUNTO, António Verdiál de Sousa, preokupa ho ahí mate-lakan iha oras ba oras, nune’e bolu atensaun ba EDTL, E.P atu tau atensaun, tanba la kle’ur tan Amu Papa Francisco sei halo vizita mai Timor-Leste.
“Se bainhira Amu Papa Francisco nia vizita ne’e mak hasoru ahí mate-lakan, hanoin ne’e problema boot, entaun EDTL, E.P presiza tau atensaun sériu,” nia dehan.
Jornalista : Nelson de Sousa
Editór : Cancio Ximenes