TL promove iha dezembru kona-ba identidade indústria kulturál iha Singapura
DILI, 18 jullu 2024 (TATOLI) – Ministériu Komérsiu no Indústria (MCI) hamutuk ho Embaixadór Timor Leste (TL) iha Singapura no Sekretaria Estadu Arte no Kultura (SEAC) asina akordu kona-ba promove identidade indústria kulturál Timor-Leste nian iha Embaixada Timor-Leste nian iha Singapura.
Timor-Leste sei hala’o eventu ne’e iha dezembru tinan ida-ne’e. Objetivu mak promove identidade kulturál iha Singapura. Inisiativa ne’e hakarak intensifika relasaun komersiál no atrai investimentu estranjeiru.
“Eventu ne’e sai hanesan plataforma ida hodi promove produtu lokál sira, atrai investimentu estranjeiru no habelar oportunidade komersiál sira, liuliu iha setór privadu, hodi kontribui ba dezenvolvimentu ekonómiku nasaun nian”, Ministru Komérsiu no Indústria (MCI), Filipus Nino Pereira dehan ba TATOLI iha edifisiu MCI, Bebora.
Nia dehan, atividade promosaun ida-ne’e atu promove imajen Timor-Leste nian iha palku internasionál, hodi kontribui ba kresimentu ekonómiku no dezenvolvimentu sustentavel nian. Eventu ne’e prinsipál atu atrai parseitu komersiál ne’ebé konfiavel no atrativu.
“Produtu espesífiku ne’ebé sei promove iha eventu ne’e, mak ita fó prioridade ba setór privadu, ho énfaze espesiál ba empreza mikro, ki’ik no médiu sira, tanba sira sei iha oportunidade atu promove no habelar sira-nia produtu, entre sira seluk, agríkola no artezanatu iha merkadu Singapura nian”, nia adianta.
Nia hateten, programa ida-ne’e sei organiza hosi parte relevante ne’ebé mensionadu no sei fahe tarefa ba malu katak embaixada sei responsabiliza no prepara kona-ba lojístika, SEAC sei mobiliza grupu kulturál no artístiku no MCI sei finansia viajen emprezáriu kiik no médiu sira.
Iha fatin hanesan, Embaixadór Timor-Leste iha Singapura, Alex Tilman, konsidera eventu ne’e hanesan espasu ida ba setór privadu sira, hodi promove planu sira negósiu nian, promove riku-soin nasaun nian no diversidade kulturál, nune’e mós loke odamatan ba kolaborasaun sira iha investimentu sira no hametin relasaun diplomátika sira entre nasaun rua.
“Inisiativa ne’e hola parte iha diplomasia ekonómika, tanba la’ós de’it habelar prezensa kulturál Timor-Leste nian liu fali nia fronteira sira, maibé hola parte iha planu no prioridade ezekutivu timoroan nian hodi atrai investimentu estranjeiru. Tanba ita iha potensiál investimentu iha área oioin, maibé ita presiza investimentu estranjeiru hodi dezenvolve ita-nia ekonomia no kria empregu ba ita-nia sidadaun sira”, Alex Tilman konklui.
Jornalista : Felicidade Ximenes
Editór : Zezito Silva
