DILI, 19 jullu 2024 (TATOLI)—Sekretaria Estadu Formasaun Profisionál no Empregu (SEFOPE) hamutuk ho Fundu Kapitál Dezenvolvimentu Umanu (FDCH, sigla portugés), sesta ne’e, fó asina kontratu ba formadór lian inglés hamutuk 40 hodi desloka ba munisípiu hotu inklui Rejiaun Administrativu Espesiál Oé-cusse Ambeno (RAEOA).
Sekretáriu Estadu Formasaun Profisionál no Empregu, Rogério Araújo Mendonça, hateten, ohin SEFOPE fó kontratu ba formadór na’in-40 no koordenadór na’in-hitu.
“Ita fó kontratu ba formadór sira ne’e ho objetivu atu desloka bá munisipiu sira hodi hanorin ita-nia kandidatu traballadór sira neʼebé aplika ba online, ne’ebé hetan valór sufisient, poor no verry poor ne’e hodi hasa’e sira-nia koñesimentu lian inglés hodi muda sira ba kategória, excellent, verry good no good,” Sekretáriu Estadu Rogério Araújo Mendonça, hateten, iha salaun SEFOPE, Caicoli.
Notisia relevante : Aplikante 42.081 vaga serbisu iha Austrália liu hotu teste eskrita
SEFOPE ho inisiativa halo rekrutamentu ba formadór sira hodi destaka bá munisipiu ne’e hodi hakma’an joven sira hodi lalika mai tuir formasaun lian inglés iha Dili.
“Tanba formadór sira neʼebé ita halo rekrutamentu ne’e la’ós naran foti de’it maibé ita hili sira neʼebé iha esperiénsia hanorin lian inglés tinan barak inklui sira neʼebé hasai lisensiatura iha lian inglés,” nia akresenta.
Formadór na’in 40 ne’e sei destaka bá munisípiu ida ema na’in-haat inklui koordenadór ida, maibé ba koordenadór rasik foin hitu ho razaun SEFOPE sei halo selesaun di’ak molok fó kontratu.
“Sira ne’e ita kolola de’it iha kapitál munisipiu hodi fó formasaun ba joven sira, ita la koloka to’o postu administrativu sira tanba rekursu umanu la to’o,” nia dehan.
Formadór no koordenadór hamutuk 47 neʼebé ohin asina ona kontratu tuir termu sei ramata iha loron 31 dezembru 2024.
“Ba tinan oin ita sei haree karik parte FDCH kontinua fó apoiu fundu ita mós kontinua kontratu sira,” governante ne’e tenik.
Iha fatin hanesan, Adjuntu Diretór Ezekutivu FDCH, Rogério Lay, hateten, apoiu kapitál neʼebé FDCH fó tanba mai ho programa prinsipál haat hanesan formasaun profisionál, téknika, bolsa estudu no boa governasaun.
Hahú iha tinan 2011 to’o agora FDCH finsansia ona SEFOPE hodi fó formasaun ba foin-sa’e timoroan barak neʼebé asesu merkadu traballu hanesan programa formasaun lian koreia iha Becora.
“Ba tinan ne’e ita prevee orsamentu apoiu ba SEFOPE ne’e hamutuk $250.000 ba programa formasaun lian ba joven sira hodi asesu ba kampu serbisu iha Austrália. Husu ba formadór sira uza oportunidade ida-ne’e ho dí’ak hodi fó formasaun ba joven sira neʼebé hein hela oportunidade atu bá serbisu iha Austrália,” nia tenik.
Formadór Carlito Marçal husi munisípiu Manufahi, sente kontente tebes tanba hetan oportunidade sai formadór lian inglés ba foin-sa’e sira ne’ebé hein oportunidade.
“Ha’u sente kontente tebes bele hetan oportunidade di’a tanba oportunidade ne’ebé ha’u hetan liuhusi kompetisaun naruk, tanba ne’e ha’u sei aproveita oportunidade ho di’ak hodi fahe esperoénsia ne’ebé ha’u iha,” nia katak.
Jornalista : Arminda Fonseca
Editora : Julia Chatarina
