Top

Fundasaun Nippon oferese roupa 3.000 ba Palásiu Prezidensiál tulun komunidade

tnf_ogimage

DILI, 19 jullu 2024 (TATOLI) – Fundasaun Nippon husi nasaun Japaun hasoru Prezidente Repúblika, José Ramos Horta hodi fó doasaun roupa hamutuk 3.000 nune’e bele oferese ba komunidade sira iha área rurál.

Prezidente Sentru Voluntáriu Fundasaun Nippon Yasushi Yamawaki, hateten, enkontru ho Prezidente Repúblika no fó doasaun ne’e ho objetivu atu hametin kooperasaun entre nasaun rua, nune’e bele implementa Fundasaun Nippon nia programa sira iha Timor-Leste.

“Hanesan inísiu kooperasaun Sentru Voluntáriu Fundasaun Nippon hamutuk ho Embaxadór Japaun mai Timor – Leste Tetsuya Kimura fó doasaun roupa 3.000 ba Prezidente Horta hodi fahe ba povu iha área rurál,’’ Yamawaki hateten, hafoin enkontru ho PR Horta iha Palásiu Prezidensiál, ohin.

Alende ne’e, Sentru Voluntáriu Fundasaun Nippon sei haruka estudante Japaun na’in-30 iha fulan-outubru tinan ne’e atu halo estudu komparativu ho estudante timoroan  sira iha área rurál hodi fahe esperiénsia ba malu iha dezenvolvimentu nasaun inklui atu dezenvolve mós desportu iha nasaun ne’e.

“Kooperasaun ida-ne’e sei kontinua iha futuru hodi enkoraja juventude Timor-Leste iha dezenvolvimentu nasaun ne’e iha futuru,’’ nia dehan.

Iha enkontru ne’e Prezidente Repúblika Horta apresia Sentru Voluntáriu Fundasaun Nippon nia inisiativa no husu atu kontinua kooperasaun ida ne’e hodi hakbi’it juventude Timor-Leste liuhusi atividade oioin inklui dezenvolvimentu desportu iha Timor-Leste.

Entretantu, Fundasaun Nippon husi Tókio, Japaun, maka organizasaun privadu, naun-lukrativu ne’ebé fó subsídiu. Fundasaun ne’e harii iha tinan-1962 hosi Ryoichi Sasakawa.

Nia misaun maka atu dirije rendimentu husi korrida ró-motór Japaun nian ba atividade filantrópiku sira, nia uza osan ne’e hodi hala’o dezenvolvimentu marítima globál no asisténsia ba serbisu umanitária, tantu iha rai-laran no iha rai-li’ur. Iha kampu umanitária, Fundasaun Nippon foka ba kampu sira hanesan bem-estar sosiál, saúde públika, no edukasaun.

Prezidente atuál maka Yohei Sasakawa, Embaixadór Boa Vontade Organizasaun Mundiál Saúde nian ba Eliminasaun Lepra, Enviadu Espesiál Governu Japaun nian ba Rekonsiliasaun Nasionál iha Myanmar, no oan-mane hosi fundadór nia fundasaun, Ryoichi Sasakawa.

Jornalista: Hortencio Sanchez

Editór: Rafael Ximenes de A. Belo

Publisidade

Leave a Reply

Latest Post

error: Content is protected !!