HoREX rejista pasiente na’in-60 lakon vida
BAUCAU, 17 jullu 2024 (TATOLI) – Ospitál Rejionál Eduardo Ximenes (HoREX, sigla portugés) durante trimestrál daruak husi fulan-abríl to’o junñu rejista pasiente na’in-60 lakon vida.
Diretór Klínika HoREX Baucau, Mouzinho Francisco da Costa Belo, esplika, pasiente hirak-ne’e lakon vida bainhira halo tratamentu ho kondisaun grave ne’ebé maioria sofre moras ISPA no bronkonomonia inklui mos seluk tán nune’e konsideradu halo tratamentu tarde.
“Dalabarak sira grave tiha mak mai, tanba iha uma halai uluk ba tradisional, entaun buat-ne’ebé ita iha maibé labele salva,” Diretór Klínika HoREX Baucau hateten iha Vila Nova, kuarta ne’e.
HoREX Baucau rejista mós pasiente hamutuk 2.174 mak halo tratamentu internamentu durante fulan-tolu nune’e rezulta ema na’in-60 mak lakon vida, maske médiku sira halo esforsu.
Daudaun ne’e iha ospitál referida estoke mamuk hamutuk 11%, balun laiha durante fulan ona, maibé prosesu atendimentu ba pasiente kontinua la’o ho normál.
Ai-moruk ne’ebé estoke mamuk mak hanesan, diasepasan tablet, ipertensaun, albendazole, missapodir no seluk tan.
“Ai-moruk sira-ne’e di’ak, tanba sei iha ai-moruk seluk atu taka fali ba ida laiha nee,” Mouzinho akresenta.
HoREX Baucau hato’o ona pedidu ba parte INFP Rejionál Baucau, no tuir planu sei responde iha tempu besik.
Mouzinho, hateten, moras ISPA afeta ba pasiente sira, tanba kauza husi rai rahun inklui ahi su’ar tanba maioria komunidade sira sei utiliza sistema tradisionál nune’e afeta ba saúde no menus halo tratamentu.
HoREX Baucau rejista pasiente sira maihusi munisípiu haat hanesan Lautém, Viquque, Manatuto no Baucau.
Jornalista : Natalino Belo
Editór : Evaristo Soares Martins
