VIQUEQUE, 19 jullu 2024 (TATOLI)- Prezidente Autoridade Munisípiu (PAM) Viqueque, Francisco C.S de Gonzaga Soares, sesta ne’e, selebra kontratu ba empreza vensedór haat hodi ezekuta projetu Planeamentu Dezenvolvimentu Integradu Munisipál (PDIM) hamutuk haat iha tinan 2024.
“Iha fulan kotuk ami loke konkursu públiku no ami hahú asina kontratu ho empreza sira atu sira implementa servisu. Ezekusaun ba projetu sira-ne’e ho durasaun fulan-lima, hahú husi loron 18 Jullu to’o loron 31 Dezembru 2024 tenke finaliza. Tanba tinan ida ne’e, laiha orsamentu re-apropriasaun ba projetu hirak ne’ebé la ezekuta tuir tempu ne’ebé determina”, Francisco C.S de Gonzaga Soares, hateten ba jornalista sira, iha administrasaun Viqueque, ohin.
Nune’e, PAM Viqueque ne’e kongratula ba empreza sira-ne’ebé hetan konfiansa liuhusi avaliasaun Komisaun Aprovizionamentu Munisipál (KAM) no husu atu ezekuta projetu ho resposabilidade no kualidade. .
“Ha’u husu ba kompaña sira nafatin iha kooperasaun di’ak ho enjiñeiru sira hodi aselera servisu hodi bele finaliza projetu ne’e iha fulan-lima no tenke garante nia kualidade”, nia sujere.
Projetu konstrusaun haat ho orsamentu $258,680.21, mak hanesan projetu konstrusaun foun loke estrada ba fatin lixu jerál aloka orsamentu $237,861.84, konstrusaun foun edifísiu Ensinu Báziku Sentrál 01, ho orsamentu $175,514.96, konstrusaun foun edifísiu Sekretáriu Estadu Formasaun Profisionál no Empregu (SEFOPE) ho morru ho $258,680.21 no konstrusaun foun edifísiu Ensinu Báziku Filiál (EBF) Uaimori, ho alokasaun $181,669.60.
Obra referida sei responsavél husi empreza sira hanesan TRES IRMAÕS Unip.Lda sei ka’er obra konstrusaun foun loke estrada ba fatin lixu jerál, Empreza MAKBES LIU DEI, Unip.Lda konstrusaun foun edifísiu EBC 01, empreza SOVILHOSNA Unip.Lda, konstrusaun foun edifísiu SEFOPE ho morru no empreza CARNEÇIA RECORDAÇÃO, Unip.Lda, konstrusaun foun edifísiu EBF Uaimori.
Jornalista : Vitorino Lopes da Costa
Editór : Florencio Miranda Ximenes
