Reabilitasaun rezidénsia madre ALMA atinje 99%

DILI, 19 jullu 2024 (TATOLI)–Enjeiñeiru Empreza Hoven II Unipesoál, Lda, Januário da Silva, hateten totál reabilitasaun ba rezidénsia madre Asosiasi Lembaga Misionaris Awam (ALMA) iha Pantai Kelapa atinje ona 99%.

Nia esplika nahe pavimentu iha uma oin ne’e mak sei atinje 90% no hela monta asesoria liur hanesan lutu kiik sira no monta Air Conditioner (AC) iha laran, tanba materiál iha hotu ona no hein atu monta de’it.

“Iluminasaun, sala ka aula prontu ona atu liga mak eletrisida mai hodi halakan. Hein loron ida de’it hanesan ne’e bele liga. Tanba ne’e mak totál husi reabilitasaun ne’e, ita bele dehan atinje ona 99%,” Januário da Silva hateten ba Agência Tatoli iha rezidénsia madre ALMA, iha Pantai Kelapa, sesta ne’e.

Obra reabilitasaun ne’e sei entrega iha fulan-agostu, tanba servisu la’o hela no hela atu nahe pavimentu iha li’ur ne’e de’it.

“Ami presiza tan semana rua hanesan ne’e atu konklui reabilitasaun ne’e. Bele iha fulan-jullu nia rohan no iha agostu ne’e, ami atu entrega,” nia dehan.

Tuir ajenda vatikanu nian, iha tersa (10 setembru 2024), tuku 08h45 dadeersan, Papa Francisco sei vizita labarik sira ema ho defisiénsia (moras autis) ne’ebé hela iha orfonatu ne’ebé madre sira husi kongregasaun Asosiasi Lembaga Misionaris Awam (ALMA) mak hamatan, iha Pantai Kelapa, Dili.

Oráriu Papa Francisco vizita Timor-Leste

Iha segunda (09 setembru 2024, iha tuku 11h40 oras Papua Novaguine no oras loloos iha TL ne’e 11h40, Papa Francisco hamutuk ho delegasaun sei voo husi Aeroportu Internasionál Jacksons Port Moresby Papua Novaguine mai Dili-Timor-Leste no tuir oráriu sei to’o iha Aeroportu Intgernasionál Nicolau Lobato, Comoro, iha tuku 14h10.

Antes ne’e, Arsebispu Arkidioseze Metropolitana Dili, Dom Virgílio Kardeál do Carmo da Silva, SDB, hateten hafoin Papa Francisco to’o iha aeroportu Comoro, Papa ho nia delegasaun sei simu husi Xefe Estadu no Governu no bispu sira iha Timor-Leste, hafoin ne’e Papa sei ba deskansa iha Nunsiatura Apostolika iha Motael, Dili.

“Vizita pastorál ne’e hanesan vizita pastorál ida-ne’ebé la’o dook tebes no kle’ur liu, tanba Papa Francisco tenke vizita Indonézia, Papua Novaguine, Timor-Leste no Singapura. Tanba ne’e, iha aeroportu internasionál Prezidente Nicolau Lobato, Comoro, la simu ho serimónia simu nian ne’ebé kle’ur tanba Papa kolen, nune’e Papa ba liu Nunsiatura Apsotolika iha Motael,” Dom Virgílio Kardeál hateten iha sorumutu ho voluntáriu sira, iha DIT.

Hafoin ne’e, iha tuku 18h00 lorokraik, Papa Francisco ne’ebé hanesan Xefe Estadu Vatikanu nian ne’e sei ba iha Palásiu Prezidensiál Nicolau Lobato, Bairru Pite, hodi hala’o enkontru ho Prezidente Repúblika, José Ramos Horta. Iha oras hanesan, Primeiru-Ministru, Kay Rala Xanana Gusmão, sei hasoru malu ho ninia omologu Kardinal Pietro Parolin, ne’ebé sei la’o durante minutu 20 nia laran.

Iha Palásiu Prezidensiál Nicolau Lobato, iha tuku 19h00 kalan ne’e, Papa Francisco sei lee ninia diskursu ne’ebé partisipa husi Xefe Governu no membru Governu da-sia (IX), sosiedade sivil, korpu diplomátiku no konvidadu sira seluk hafoin fila hikas ba Nunsiatura Apostolika Motael.

Iha tersa (10 setembru 2024), iha tuku 08h45 dadeersan, Papa Francisco sei vizita labarik sira ema ho defisiénsia (moras autis) ne’ebé hela iha orfonatu ne’ebé madre sira husi kongregasaun Asosiasi Lembaga Misionaris Awam (ALMA) mak hamatan, iha Pantai Kelapa, Dili.

Iha tuku 09h30, Papa Fransico sei halo sorumutu ho bispu, padre, madre, diaknu, seminarista no katekista sira iha igreja Imaculda Conceição Katedrál Vila Verde, Dili. Ida-ne’e sorumutu ofisál ho igreja Katólika iha Timor-Leste ne’ebé la’o durante oras ida nia laran no Papa sei halo diskursu.

Iha tuku 10h45, Papa Francisco sei halo sorumutu ho padre na’in-38 husi kongregasaun Jesuita iha Timor-Leste iha rezidénsia Nunsiatura Apostolika iha Motael, Dili.

Iha tuku 16h30 lorokraik, Papa Francisco sei prezide misa solene iha Tasi-Tolu ne’ebé tuir planu sei partisipa husi sarani sira hamutuk 700.000 ne’ebé maihusi dioseze Dili, Baucau no Maliana inklu peregrinu sira husi Nusa Tenggara Timur (NTT)-Kupang-Indonézia no Austrália. Tuir planu, misa ne’e la’o durante oras ida ho balun de’it, no sarani sira simu komuñaun kala la’o minutu 10 nia laran deít.

“Misa labele la’o kle’ur. Sarani sira simu komuñaun ne’e, la’o durante minute 10 de’it. Tanba, iha padre ka madre hamutuk 1.000 no hetan apoiu husi ministru estraordináriu hamutuk 3.000 hodi fahe komuñaun. Iha Tasi-Tolu, sei harii kapeliña simples hamutuk 20 no kada kapela ne’r iha siboriu ka kalis 2.00. Ita iha ona alvu katak padre ida sei fó komuñaun ba ema 150 no hein katak iha minutu lima (5) nia laran ne’e komuñaun bele ramata,” Dom Virgílio Kardeál hateten.

Uha kuarta (11 september 2024), iha tuku 09h30, Papa Francisco sei hala’o sorumutu no sei fó diskursu ba reprezentante juventude katólika husi dioseze Dili, Baucau no Maliana hamutuk 3.000 ne’ebé maihusi kada parokia, no sorumutu ne’e la’o durante oras ida nia laran iha Sentru Konvensaun Dili (CCD, sigla portugés).

Hafoin sorumutu ne’e, iha tuku 10h45, sei halo serimónia despedida iha aeroportu Internasionál Prezdidente Nisolau Lobato, Comoro, Dili, antes Papa Francisco ho delegasaun sei voo ba Singapura.

Jornalista : Jesuína Xavier

Editór        : Cancio Ximenes