DILI, 19 jullu 2024 (TATOLI) – Prezidente Rejiaun Administrativa Espesiál Oé-Cusse Ambeno, Rogério Tiago Lobato, informa daudaun ne’e halo ona investimentu ba setór agrikultura no produsaun hare, nune’e époka ne’e produsaun sa’e maka’as iha Oé-Cusse kompara ho tinan sira ba kotuk.
“Ba dezenvolvimentu ekonomia iha RAEOA, hafoin ami simu posse, hahú daudaun ona investimentu iha área produsaun agríkola natar nian, iha ne’ebé uluk prodús de’it tonelada rua-resin, ohin loron, konsege hasa’e produtividade ba tonelada neen-resin kada ektare,” Rogério Lobato hateten ba jornalista sira iha Palásiu Prezidensiál Dili hafoin enkontru ho Xefe Estadu José Ramos Horta.
Nia dehan, produsaun agrikola hanesan hare sa’e maka’as iha RAEOA tanba utiliza investimentu adubu orgánika husi Filipina ne’ebé investe iha RAEOA.
Prezidente RAEOA salienta, sei aproveita natar ektare 1000-resin iha RAEOA atu bele hasa’e prodúsaun hare barak liután inklui hasa’e produtividade produtu agríkola iha Oe-Cusse.
Iha parte seluk durante hasoru malu Rogério Lobato agradese ba Xefe Estadu tanba promove imajen RAEOA ba mundu durante hala’o vizita Estadu ba rai-liur.
Nune’e nia husu ba Xefe Estadu nia vizita sira iha estranjeiru iha fulan ne’e nia laran atu ba nasaun Xina, kontinua atu tau atensaun (promove) RAEOA iha internasionál.
Biban ne’e, lideransa másimu REAOA simu mós ideia husi Prezidente Repúblika atu hala’o serbisu ho másimu no labele haree ba kor partidu polítiku tanba timoroan iha direitu atu kontribui ba dezenvolvimentu.
“Prezidente Ramos Horta husu atu kontinua hala’o serbisu no simu ema hotu, la hare ba partidu maibé haree hanesan Oé-Cusse oan atu serví RAEOA di’ák liutan,” nia konklui.
Jornalista: Hortencio Sanchez
Editór: Florencio Miranda Ximens
