DILI, 19 jullu 2024 (TATOLI) – Prezidente Autoridade Rejiaun Administrativa Espesiál Oé-Cusse-Ambeno (RAEOA), Rogério Tiago Lobato, relata progresu serbisu durante iha Oé-Cusse ba Xefe Governu,Kay Rala Xanana Gusmão.
Iha ámbitu hasoru malu ne’e Rogério Lobato entrega mós relatóriu irregularidade iha prosesu sosa Ró Haksolok no aviaun Zona Espesiál Ekonomia Sosiál Merkadu (ZEESM) bá Primeiru-Ministru.
“Ha’u mai hasoru-malu ho Primeiru-Ministru hodi ko’alia kona-bá situasaun iha Oecuse no progeresu serbisu sira. Ha’u entrega mós relatóriu irregularidade kona-bá Ró Haksolok no aviaun ZEESM. Relatóriu ne’e inklui kedan ona ho evidénsia ne’ebé hetan. Ida-ne’e bele ajuda auditoria internasionál ne’ebé sei halo,” Rogério Lobato hateten hafoin enkontru ho Primeiru-Ministru iha Palásiu Governu, sesta ne’e.
Konabá prosesu tuir-mai, Rogério Lobato dehan depende ba desizaun Primeiru-Ministru nian bazeia ba rekomendasaun hosi ekipa auditoria internasionál.
Antes ne’e liu husi auditória Tribunál Kontas deskobre katak, hosi tinan 2014 to’o 2018 Timor-Leste gasta millaun $24,5 bá konstrusaun Ró Haksolok, maibé paradu tinan barak nia laran tanba falla iha desizaun ne’ebé foti iha fulan agostu 2014 hodi ajudika direta bá empreza Atlantic Eagle ne’ebé bankarota ona no konsidera laiha transparánsia.
Líder másimu RAEOA ne’e mós preparadu atu bá hatán bainhira hetan notifikasaun hosi Ministériu Públiku (MP) ligadu ho polémika uma Estadu iha área Fulolo, aldeia Sanane, Suku Costa, Sub Rejiaun Pante Macasar.
Jornalista: Hortencio Sanchez
Editór: Florencio Miranda Ximenes
