DILI, 22 jullu 2024 (TATOLI)—Diretór Ezekutivu Fundu Dezenvolvimentu Kapitál Umanu (FDCH, sigla portugés), Júlio Aparício, prefere halo diálogu hodi bele buka solusaun ba problema bolsa.
“Ha’u sei konfirma Ministru Planeamentum Investimentu Estratéjiku (MPIE), Gastão Sousa, karik iha tempu, ha’u bele lori Prezidente Konsellu Administrasaun maibé desizaun ne’e iha Prezidente nia liman, maibé Konsellu Administrasaun sei ba aprezenta iha Konsellu Ministru (KM) mak bele deside,” Diretór Ezekutivu hateten hafoin dada lia ho bolseiru bolsa parsiál ne’ebé halo manifestasaun iha edifísiu FDCH nia oin, segunda ne’e.
Júlio Aparício dehan, nia parte prontu hasoru Governu hodi esplika ba sira no bele fasilita atu parte rua bele iha solusaun.
“Ha’u sei lori reprezentante grupu bolsa subsídiu ne’e na’in-lima hodi ba hasoru Ministru no hato’o sira-nia aspirasaun, hafoin Governu bele deside,” nia akresenta.
FDCH iha dadus valór bolseiru ne’ebé mak avalia husi tékniku, ne’ebé valór la to’o 2,5.
“Imi mak mai hatama valór, nune’e husu ba ita-nia an no labele husu ba Estadu. Tanba ne’e FDCH labele foti desizaun ba asuntu ne’e maibé desizaun ne’e iha Governu, Estadu no Parlamentu Nasionál mak hatene,” nia tenik.
Notísia relevante : Bolseiru bolsa hakbiit husi IES 17 la konkorda desizaun hamosu bolsa parsiál
Portavós Bolseiru Hakbiit, José da Costa, husu FDCH atu solusiona programa bolsa hakbiiit ba bolsa parsiál tanba ne’e sira-nia direitu.
“Últimu desizaun ne’ebé mak ami foti ne’e halo manifestasaun hasoru FDCH hodi fó solusaun imediata ba lalais ba ami-nia problema. Ita tenke hatene halo diferensa entre bolsa parsiál no bolsa hakbiit. Enkuantu mai nu’udar bolsa hakbiit Governu oferese hahú iha tinan 2021-2023”, nia salienta.
Entaun, husi ne’e bolseiru la konkorda muda ba bolsa parsiál tanba tuir kontratu ne’ebé iha katak sei válidu hela no prosesu estudu la’o hela no iha balun ne’ebé foin eskola tinan ida no rua.
“Ida-ne’e mak ami la konkorda no halo asaun pasífika. Bainhira Governu la muda ba bolsa parsiál mak ami mantein ami-nia pozisaun ba manifestasaun iha FDCH nia oin to’o hetan solusaun,” Estudante ne’e katak..
FDCH fó bolsa parsiál ba estudante 3.030 hosi Institutu Ensinu Superiór (IES) 17 iha Timor-Leste.
Programa bolsa parsiál bazeia ba diploma ministeriál númeru 78/2021 10 novembru relasiona ho rejime atribuisaun bolsa estudu ba frekuénsia iha territóriu nasionál no regulamentasaun pedidu individuál apoiu finanseiru ba estudu iha ensinu superiór akreditadu nasionál.
Programa ne’ebé oferese husi FDCH ne’e fó apoiu de’it ba kustu propina estudante nian to’o konklui estudu no sei la kobre selu kustu sira seluk hanesan kustu moris, alojamentu no kustu didátiku.
Enkuantu, bolsa hakbiit kada bolseiru sei hetan kustu vida $120 kada fulan hodi kobre sira-nia alojamentu, transporte, alimentasaun no ekipamentu didátiku. Enkuantu, ba propina nian Governu sei transfere direita ba konta bankária universidade ne’ebé benefisiáriu sira hala’o estudu.
Jornalista : Osória Marques
Editora : Julia Chatarina
