DILI, 22 jullu 2024 (TATOLI)—Diretora Institutu Nasionál Linguístika (INL), Rosa da Costa, nota katak produtu jornalístiku Agência Tatoli nian tuir ona padraun INL maibé tenke konsistente iha hakerek.
“Ami-nia akompaña, avaliasaun, observasaun ba produtu Agência Tatoli nian, mídia nasionál hotu ami akompaña sempre hakerek di’ak hotu, maibé Agência Tatoli sempre tuir regra padraun INL nian no buat ida karik besik liu INL. Maibé atu dehan produtu Agência Tatoli hakerek tuir padraun INL maibé tenke konsistente iha hakerek,” Rosa da Costa hateten ba Agência Tatoli, iha ninia knaar fatin, UNTL, segunda ne’e.
Nia dehan, importante mak tenke konsistente atu hadi’a di’ak liután fraze no husu atu jornalista sira Agência Tatoli presiza tuir formasaun formál nune’e bele haforsa liután kualidade hakerek notísia ho uzu INL.
“Ami-nia interrese ita-boot sira halo iha prátika, hakerek prátika INL tuir padraun ne’ebé iha. Ita-boot sira presiza tuir formasaun tuir mai para di’ak liután, nune’e mós iha fraze ruma presiza hadi’a no importante konsistente,” nia akresenta.
Notísia relevante : INL sei melhora di’ak liután tradusaun lian tétum iha Google tradutór
Nia fó hanoin, fraze ida mak haluha buat balun iha ne’ebá mak nia intensaun sai oin seluk tiha tanba ne’e parte balun hadi’a mak presiza hatene nia elementu ligasaun entre liafuan ba fraze ida.
“Ami rekomenda mak maintein no labele kontente ho ne’e, maibé atu di’ak liután presiza asesu ba livru matadalan ortografia. Labele hanoin Google tétun iha ona, ne’ebé ita labele laran metin ba ida-ne’e, ita tenke haree ita-nia ortografia,” nia fó hanoin.
Biban ne’e, ekipa INL parabeniza Agência Tatoli ba aniversáriu daualu (27/07/2016-27/07/2024).
“Susesu liután iha futuru no husu tenke konsistente ho hakerek, ne’e importante tebes. Parabéns, parabéns no parabéns,” Diretora tenik.
Agência Tatoli, I.P nu’udar ajénsia ofisiál Estadu Timor-Leste nian, ne’ebé ninia ezisténsia mai husi inisiativa Sekretaria Estadu Komunikasaun Sosiál (SEKOMS) iha tinan 2017, nu’udar transformasaun husi East Timor News Agency (ETNA), ne’ebé nakfila ba Ajénsia Notisioza Timor-Leste (ANTIL), no ikus mai sai Agência Tatoli.
Ajénsia Estadu ne’e hetan aprovasaun iha reuniaun Konsellu Ministru no públika iha Jornál Repúblika iha loron 14 marsu 2016, nu’udar embriaun ho naran ANTIL ne’ebé lansa iha 27 jullu 2016.
Nune’e, Konsellu Ministru iha marsu 2017, transforma ANTIL sai Agência Tatoli, nu’udar ajénsia ofisiál Estadu Timor-Leste no publika iha Jornál Repúblika, ho estatutu nu’udar Institutu Públiku (I.P).
Objetivu estabelese Agência Tatoli, I.P hodi fontes informasaun ofisiál Estadu Timor-Leste ne’ebé iha kapasidade no kbiit elabora produtu informasaun no notísia ne’ebé nesesita husi públiku utilizadór informasaun iha eskala nasionál, rejionál no internasionál, bazeia natureza no karakterístika, rapidez no rigór, ne’ebé la ignora rigoroza hanesan akurásia, indepedente, inzenta, klareza no nafatin iha integridade nomós kualidade.
Jornalista : Osória Marques
Editora : Julia Chatarina
