DILI, 22 jullu 2024 (TATOLI)—Prezidente Konsellu Administrasaun Eletrisidade de Timor-Leste, Empreza Públika (EDTL, E.P), Paulo da Silva, hateten, transformasaun Diresaun Jerál Elestrisidade sai empreza públika iha 2021, iha ona planu prioridade ida atu halo konversaun diesel ba jeradór sentrál Hera no Betano, iha tinan 2026.
“EDTL, E.P iha tinan 2027 hakarak koko atu halo konversaun diesel ka gás ba jeradór rua iha Hera no Betano, ida ho objetivu atu gás tanba kontinua uza kombustível ne’e susar nafatin tanba kada tinan Governu tenke hasai osan millaun $126 liu hodi sosa kombustível,” Paulo da Silva, relata iha salaun Delta Nova, Comoro, segunda ne’e
Antes ne’e, ekipa konklui ona estudu viabilidade ba gás ne’e iha semebru 2022 maibé ita la konsege kontinua ninia implementasaun tanba despeza boot.
“Ita tenke tau millaun $250 atu harii planta enerjia nomós fasilidade komplementár inklui kustu ba konversaun jeradór rua ne’e rasik, entaun Governu foku uluk liuba enerjia renovável, ida-ne’e ita implemeta fali iha tinan 2026 no 2027,” nia akresenta.
Notísia relevante : Timor-Leste ho Nova Zelandia diskute matadalan utilizasaun enerjia renovavel
Razaun Governu halo konversaun no investe enerjia renovável tanba haree ba kustu kombustível ne’ebé sa’e kada tinan.
“Daudaun ita foku uluk mak enerjia renovável solar PV 72MW ne’ebé implementa iha Laleia munisípiu Manatuto, progresu semana ida tan ita sei hato’o pedidu ba Ministru atu autoriza asina akordu ba prosesu hahú konstrusaun ba solar PV ne’e rasik, kompañia sé no orsamentu hein Ministru asina mak ita fó sai,” Prezidente Konsellu Administrasaun, informa.
Investe ba enerjia renovável nu’udar poupansa ba kombustível no opsaun seluk mak reforsa ba solár PV 72MW iha Laleia.
“Ita mós finaliza iha estudu viabilidade ba anin nian ne’ebé halo hamutuk ho parseiru International Finance Corporation (IFC) halo iha munisípiu Bononaro, Aileu no Viqueuqe, ikus ita haree opsaun iha Lariguto, Ossu, Viqueuqe mak iha poténsia boot atu esplora tan ida-ne’e atu komplementa ba solar PV nian,” nia dehan.
Opsaun seluk mak tinan oin 2025 EDTL,E.P sei halo estudu viabilidade ba ídroelétriku atu haree esplora hodi komplementa tan ba solar PV nian nune’e bele redús ona ba kustu ba kombustível iha sentru elétriku iha Hera no Betano.
Jornalista : Arminda Fonseca
Editora : Julia Chatarina
