DILI, 22 jullu 2024 (TATOLI)—Prezidente Fundasaun GX husi nasaun Xina ho komitiva hasoru malu ho Prezidente Repúblika, José Ramos Horta, ko’alia kona-ba projetu husi Governu Xina liuhusi Fundasaun GX ba protesaun saúde atu kombate kazu isin manas no dengue iha Timor Leste.
“Enkontru ho Xefe Estadu hanesan enkontru iha fulan-novembru tinan kotuk. Iha enkontru ne’e ami esplika saida mak Fundasaun GX halo iha fulan hitu no ualu ikus ne’e. Projetu ne’ebé Fundasaun GX hala’o ne’e atu kontrola dengue isin manas,” Prezidente Fundasaun GX, Leung Chunying, hateten ba jornalista sira hafoin enkontru iha Palásiu Prezidensiál Dili, segunda ne’e.
Nia dehan, fundasaun antes ne’e fó ona doasaun ba Governu Timor-Leste liu husi apoiu ba ekipamentu saúde hanesan lampu anti susuk, moskiteiru no teste isin manas dengue.
“Iha fulan-maiu no juñu númeru kazu tun maka’as. Maibé projetu ne’e nu’udar projetu tinan rua nian, no sei kontinua. Tanba buat ne’ebé Fundasaun GX hakarak maka povu hotu-hotu bele hetan atendimentu saúde ne’ebé adekuadu iha área rurál,” nia dehan.
Tuir nia, to’o agora Fundasaun GX simu ona ekipamentu médiku husi Governu Xina hamutuk 17.000 hodi kombate moras dengue iha Timor-Leste.
“Pasiente sira ne’ebé vizita sentru saúde komunitária iha área rurál, Munisípiu sira, sei detekta lalais uluk ba moras dengue, nune’e liuhosi ekipamentu ne’ebé entrega diretamente, pasiente sira la presiza halo viajen ba Dili hodi halo tratamentu,” nia dehan.
Nia dehan tan, “Liuhusi projetu sira ne’e, ita sei hatudu rezultadu ne’ebé di’ak atu ita bele mantein nafatin amizade entre profisaun lokál sira no mós fundasaun GX”.
Nia esplika, Hospitál Nasionál Guidu Valadares (HNGV) dalaruma simu pasiente barak liu, nune’e dalaruma pasiente balun haruka ba uma, maibé liuhusi ajuda ne’e bele hamenus kazu dengue.
Jornalista: Hortencio Sanchez
Editór: Florencio Miranda Ximenes
