DILI, 22 jullu 2024 (TATOLI) – Grupu empreza distribuidora prinsipál ida ba sasán konsumidór no hala’o operasaun iha Vendas, Distribuisaun, Retallu, no Ospitalidade iha Timor-Leste (TL) alerta ba komunidade sira kona-ba hasoru fraudulentu iha konta Facebook (FB).
“Ohin, ami hatene katak konta Facebook fraudulentu oioin ne’ebé uza naran no logotipu husi grupu nia empreza identifikadu, hodi propoin solusaun investimentu nian. Konta sira-ne’e maka tentativa ida-ne’ebé klaru atu lohi ema sira ne’ebé bele fiar informasaun falsu,” sita komunikadu East Timor trading ba Agência TATOLI, ohin.
Grupu empreza ne’ebé lokaliza iha Dili ne’e, iha komunikadu ne’e fó sai katak Facebook fraudulentu oioin ne’ebé uza naran no logotipu husi grupu nia empreza identifikadu, hodi propoin solusaun investimentu nian. Konta sira-ne’e maka tentativa ida ne’ebé klaru atu lohi ema sira ne’ebé bele fiar informasaun falsu.
East Timor Trading Group seidauk publika iha kualker media sosiál ka website kualker promosaun ka proposta relasiona ho publisidade hirak ne’e. East Timor Trading Group opera de’it konta Facebook ofisiál rua: ida ba imajen korporativu no ida ba vendas no distribuisaun. Rua ne’e bele asesu liuhosi link 1) East Timor Trading Group: https://web.facebook.com/EastTimorTradingG/. No, 2) East Timor Trading Sales and Distribution: https://web.facebook.com/search/top?q=east%20timor%20trading%20sales%20%26%20distribution.
Empreza ho lema Building the future together ne’e fó sai mós katak sira la husu informasaun pesoál ka finanseira ruma liuhusi plataforma sosiál ruma, no mós la oferese solusaun investimentu ruma, partikularmente ida-ne’ebé sirkula barak ho naran “Planu Nakloke Lais Liu! Pakote Investimentu Foun!”.
Medida sira foti daudaun hodi halakon konta Facebook fraudulentu sira-ne’e, no konsidera hela asaun legál sira, inklui keixa kriminál sira hodi investiga no prosesa sira ne’ebé responsavel ba kriasaun no promosaun notísia falsu sira hanesan ne’e.
“Se ita-boot sai vítima ba bosok sira-ne’e, ami rekomenda tebes atu buka apoiu legál no hato’o keixa formál sira ba autoridade polísia sira,” empreza ne’e fó hanoin.
“East Timor Trading Group valoriza ninia seguidor/followers sira, kliente sira, no komunidade. Ami apresia ita-boot sira nia kompreensaun no kooperasaun hodi relata konta falsu sira-ne’e no ajuda ami atu mantein seguru no ambiente konfiável,” konklui.
Tatoli
