VIQUEQUE, 22 jullu 2024 (TATOLI)- Ministru Administrasaun Estatál (MAE), Tomas Cabral, segunda ne’e, fó pose ba xefe suku Builo, Postu Ossú, munisípiu Viqueque, Helio Ximenes de Fereira ho membru konsellu suku ba períodu 2024 to’o 20231.
Iha serimónia pose ne’e ba Xefe Suku, xefe aldeia na’in-haat, lia-nain suku, juventude feto no mane, delegadu feto no mane iha suku Builo.
Hafoin pose, Ministru Tomas Cabral, husu estrutura suku Builo sira-ne’ebé foin eleitu tenke hakbesik-an ba komunidade hodi haree direta sira-nia problema hodi tau programa perioridade tanba xefe suku maka sai matan tilun no ibun povu nian.
“Tanba orsamentu munisípiu nian la jere iha Díli ona, iha munisípiu ida-idak mak jere rasik. Governu iha komitmentu atu tama tinan 2025 orsamentu husi rihun $50 mai karik implementa iha munisípiu mak jere, hodi aselera prosesu dezenvolvimentu iha munisípiu. Tan ne’e ha’u husu ba munisípiu tenke fó asistensia ba xefe suku foun sira, atu suku bele prepara sira-nia planu ba tinan 2025, se ita husik sira mesak sira bele konsege halo buat ruma tanba sira la hatene prosedimentu “, Ministru,Tomas Cabaral, hateten iha serimónia tomada depose, iha suku Builo, ohin.
Governante ne’e sujere, sekretáriu munisípiu no Diretór munisipál sira tenke apoia xefe suku hodi haree ba problema bee-moos, estrada no uma ba família vulneravél sira-ne’ebé presiza.
“Xefe aldeia, Xefe suku, postu to’o munisípiu ha’u husu tenke servisu integradu. Tanba ha’u simu informasaun katak diretór munisipál ba vizita Dili mak barak liu. Ba oin diretór sira no autoridade sira tenke halo identifikasaun ba propretária estadu iha munisípiu hanesan rai no uma sira, atu ema ruma halo investimentu karik bele hatene”, ministru ne’e realsa.
Iha fatin hanesan, Xefe Suku emposadu, Helio Ximenes de Ferreira, haktuir, planu no programa ne’e konsellu suku implementa dahuluk maka halo re-ajustamentu dadús populasaun no tama sai aldeia halo identifikasaun ba komunidade sira-nia problema sira-ne’ebé durante ne’e enfrenta hanesan bee-moos no estrada inklui familia vulneravel sira.
“Iha ami-nia mandatu ida-ne’e ami sei hakbesik iha povu nian le’et, hodi haree problema sosiál sira liuliu bee-moos, estrada hodi tau ba ami-nia planu perioridade. Tanba ohin mós ministru orienta ami tama sai aldeia hodi buka hatene povu problema”, nia afirma.
Prioridade ba dezenvolvimentu infraestrutura bazika no kria pas no establidade iha suku Builo no kolabora ho povu alkansa dezenvolvimentu.
Tuir dadus suku Builo iha total aldeia haat, kompostu husi aldeia Buareka, Builo, Derulo no aldeia Lutugia ho totál abitante 1,301 no total uma-kain hamutuk 288.
Jornalista: Vitorino Lopes da Costa
Editór : Florencio Miranda Ximenes
