ILI, 22 jullu 2024 (TATOLI) – Xefe Estadu Maiór Jenerál F-FDTL, Tenente Jenerál, Domingos Raul Falur Rate Laek, hateten Komandu FALINTIL-Forsa Defeza Timor-Leste (F-FDTL), sei reforma ba membru liu 100 ne’ebé tama ona ba idade reforma iha tinan 2025.
“Lei estatutu militár foin daudaun aprova ona iha Konsellu Ministru no promulga ona husi Prezidente Repúblika, ita-nia servisu mak ne’e atu kumpre, tanba iha lei ne’e hateten katak ema ne’ebé mak to’o ona idade 55 ne’e pasa ba rezerva no ida ne’ebé mak to’o ona iha idade 60 ne’e tenke pasa ba reforma obrigatóriu”, Falur dehan hafoin vizita dahuluk iha Kuartel F-FDTL, segunda, ohin.
Nia dehan, tinan ida ne’e husi Komandu F-FDTL sei prepara kondisaun ba hirak ne’ebé atu pasa ba reforma molok Komandu deside hodi halo reforma ba sira.
“Kazu F-FDTL nian, espesifiku uitoan tanba iha ne’e mesak veteranu sira de’it, entaun Ministru Defeza mós hateten sei dignifika ba sira, entaun ita sei adianta uitoan tanba ha’u sei halo diretiva ba ida ne’e hodi hasae ba Ministru Defeza molok foti desizaun”, nia afirma.
Nia akresenta, lista ne’ebé rejistadu hamutuk liu 100 ne’ebé reforma iha 2025 maibé depende mós desizaun husi ministru.
“Tuir lolos, iha tinan ne’e, ita hahú implementa reforma ona, maibé hanesan ha’u iha kazu espesiál balun, entaun ita sei halo iha 2025. Lista ne’ebé ami iha ne’e, ba sira ne’ebé tama ona idade reforma ne’e iha ema liu 100. Maibé lista ida-ne’e depende horsida ha’u hasae ba ministru no depende desizaun ne’ebé sai husi Ministru Defeza”, nia adianta.
Iha fatin hanesan, Ministru Defeza, Donanciano Costa Gomes, hateten dekretu lei ba reforma membru F-FDTL hetan ona aprovasaun husi Konsellu Ministru iha fulan-Marsu, agora atu implementa ne’e depende ba komandu F-FDTL mak sei aprezenta lista membru militár ne’ebé tama ba rezerva no reformadu ba vida sivil.
“Agora dekretu lei ne’e aprova ona iha Konsellu Ministru atu implementa, ne’e depende ba lista ne’ebé mak Komandu F-FDTL aprezenta mai membru militár ne’ebé sei tama ba idade 55 pasa ba rezerva no idade 60 tenke reforma ba vida sivil”, nia dehan.
Nia afirma, direitu ba membru militár ne’ebé reforma ba vida sivil kontinua simu saláriu tuir saida mak sira simu iha instituisaun F-FDTL, maibé militár sira ba ona vida sivil sei hetan direitu saláriu ne’e husi Institutu Nasionál Seguransa Sosiál (INSS) iha Ministériu Solidaridade Sosiál no Inkluzaun.
“Membru militár ne’ebé reforma ba vida sivil, sira-nia direitu sei lalakon, kontinua simu saláriu hanesan saida mak sira simu iha instituisaun F-FDTL nian”, nia konklui.
Jornalista: Natalino Costa
Editór : Zezito Silva
