PR hala’o vizita Estadu bá Xina-Vietname atu hametin relasaun bilaterál
DILI, 23 jullu 2024 (TATOLI) – Prezidente Repúblika,José Ramos Horta, hateten, vizita ne’ebé nia sei hala’o ba nasaun Xina no Vietnam atu hametin kooperasaun bilaterál.
“Ha’u tempu besik sei vizita Estadu ba nasaun rua Xina no Vietnam atu hametin kooperasaun bilaterál,” Xefe Estadu hateten ba jornalista sira iha Palásiu Prezidensiál Dili, foin lalais ne’e.
Nia dehan, vizita Estadu ne’e kompostu husi delegasaun Prezidente Repúblika, Governu, setór privadu no timoroan balun.
“Baibain ha’u kuandu atu ba liur sempre lori setór privadu tanna nasaun diplpmatika tenke tane mós setór privadu, loke odamatan ba setór privadu atu fasilita sira nia lobi, sira nia kontaktu, ha’u haree Xina ho Vietnam importante atu setór privadu tenke ba hotu. Seluk mak ema simplis balu hanesan Xefe Suku no Xefe Aldeia balu la’o ho ha’u ba,” Xefe Estadu tenik.
Tuir ajenda Prezidente Repúblika nian iha vizita ne’e, hahú 27 jullu no fila fali mai Timor-Leste iha 04 agostu tinan ne’e.
“Ha’u nia viajen hamutuk ho delegasaun sira ba ko’alia oinsa atu lobi investór sira mai investe iha ita nia nasaun, ida ne’e mak lori ho setór privadu no membru Governu sira balu, bainhira fila iha fulan-agostu to’o setembru ha’u sei iha de’it rai-laran sei la sai ba liur,” nia konklui.
Jornalista: Hortencio Sanchez
Editór: Florencio Miranda Ximenes
