Xefe Estadu fó pose ba Roberto Soares nu’udar Embaixadór TL bá Indonézia
DILI, 22 jullu 2024 (TATOLI) – Prezidente Repúblika, José Ramos Horta, segunda ne’e, iha Palásiu Prezidensiál Bairru-Pite Dili, fó pose ba Roberto Sarmento de Oliveira Soares nu’udar Embaixadór Estraordináriu no Plenipotensiáriu foun husi Repúblika Demokrátika Timor-Leste bá Repúblika Indonézia.
“Embaixadór ne’e iha esperiénsia diplomátika barak ba ninia papél foun. Nia servisu tiha ona nu’udar Asistente Espesiál ba Primeiru-Ministru, Kay Rala Xanana no Xefe Ekipa Tékniku Negosiasaun ba Delimitasaun Fronteira Rai Timor-Leste,” tenik iha nota ne’ebé Agência TATOLI asesu hosi media Palásiu Prezidensiál.
ne’e, Roberto Soares nu’udar mós Sekretáriu Estadu ba Asuntu ASEAN no Vise-Ministru Negósiu Estranjeiru no Kooperasaun.
Nomeadamente, Embaixadór Roberto hala’o papél importante iha esforsu Timor-Leste atu tama ba ASEAN no lidera negosiasaun sira ba konkordansia ho Santa Sé.
Nia mós negosia Akordu Viza ho Uniaun Europeia, hodi permite viajen livre husi vistu ba sidadaun Timor-oan ba nasaun UE sira. Husi 2009 to’o 2012, nia dezempenha funsaun nu’udar Embaixadór dahuluk Timor-Leste nian ba Singapura no Brunei Darussalam.
Prezidente Ramos Horta espresa konfiansa katak nomeasaun Embaixadór Roberto sei haforsa liután kooperasaun bilaterál no amizade ne’ebé forte entre Timor-Leste no Indonézia.
Nasaun rua ne’e fahe istória no halo progresu signifikativu iha dezenvolvimentu ligasaun diplomátika no ekonómika dezde independénsia Timor-Leste iha 2002.
“Timor-Leste no Indonézia kontinua hasa’e sira-nia kooperasaun bilaterál iha setór barak, inklui parserias ekonómikas, jestaun konjunta ba fronteira no esforsu seguransa nian, interkambiu edukasionál no kulturál, dezenvolvimentu infrastrutura, envolvimentu diplomátiku, no kooperasaun saúde,” Ramos Horta hateten.
Iha okaziaun ne’e Embaixadór Roberto Soares hateten, onra boot tebes simu posse hosi Prezidente Repúblika, hanesan Embaixadór Timor-Leste ba Indonézia.
“Ha’u seidauk bele fó sai bá ita-boot sira nia lala’ok no rezultadu bá oin oinsá, tamba ida-ne’e hanesan inísiu,” Embaxadór Roberto dehan.
Tuir nia, antes halo misaun lolos sei mai fali atu hetan orientasaun ka diretiva atu nune’e bele hala’o misaun ho di’ak no komporta kompromisu tomak atu bele salva guarda interese nasionál no interese mútua entre nasaun rua, liu-liu ba povu rua, la’ós de’it bá agora maibé bá futuru tuir mai.
Notisia relevante:Ezonera António da Conceição, Assanami: “Ne’e Prezidente nia Podér”
Jornalista: Hortencio Sanchez
Editór: Florencio Miranda Ximenes
