Xefe Estadu kongratula Sua Majestade liurai Malázia
Dili, 22 jullu 2024 (TATOLI) – Prezidente Repúblika, José Ramos Horta, hodi povu Timor-Leste nia naran, hato’o ninia kmanek parabéns ba Sua Majestade Sultan Ibrahim ba ninia korasaun nu’udar Liurai dala-17 Malázia nian. Prezidente transmite nia felisitasaunn liu husi karta ida dirije ba Sua Majestade iha foin lalais ne’e.
Karta ne’ebé Prezidente Repúblika manda, destaka relasaun forte entre Timor-Leste no Malázia, ne’ebé bazeia ba solidariedade no asisténsia invaluável ne’ebé Malázia fó durante tempu krítiku sira.
Nasaun rua ne’e goza relasaun bilaterál no kooperasaun eselente, partikularmente iha área defeza, saúde, no edukasaun.
Prezidente Ramos Horta espressa gratidaun ba kontribuisaun signifikativu Malázia nian ba Timor-Leste dezde 1999.
“Dezde restaurasaun ami-nia independénsia iha Maiu 2002, Malázia nu’udar apoiante ida metin ba Timor-Leste nia aspirasaun atu tama ASEAN. Ha’u iha esperansa metin katak lius husi Presidénsia Malázia nian iha tinan 2025, Timor-Leste nia aspirasaun atu tama ASEAN sei formáliza,” Prezidente Ramos Horta tenik iha nota ne’ebé Agência TATOLI asesu husi media PR, ohin.
Iha tempu inserteza rejionál no globál sira agora, Timor-Leste haree ba Malázia nia lideransa hodi hasoru dezafiu sira ho efetivu.
Prezidente hato’o ninia konfiansa katak Malázia sei kontinua progresu no goza pás no estabilidade iha lideransa Sua Majestade Sultan Ibrahim.
Timor-Leste reprezentadu iha serimónia koroasaun husi Embaixadór Timor-Leste nian ba Malázia, Lisualdo Gaspar. Serimónia ne’e realiza iha Istana Negara, Kuala Lumpur, Malázia iha dader loron 20 Fulan-jullu 2024, oras Kuala Lumpur nian.
Jornalista: Hortencio Sanchez
Editór: Florencio Miranda Ximenes
