DILI, 23 jullu 2024 (TATOLI)–Diretór Ezekutivu Forum Organizaun Naun Governamentál Timor-Leste (FONGTIL), Valentim da Costa Pinto, konsidera kapasidade membru Governu ba ezekusaun Orsamentu Jerál Estadu (OJE) tanba ezekusaun orsamentu iha trimestre dahuluk la másimu, foin atinje de’it 32% no kapital dezenvolvimentu 8% de’it.
“Ezekusaun ein jerál Governu nian ba OJE tinan ida-ne’e, ita-nia kapasidade ba ezekusaun la másimu. Agora ita iha ona metade tinan ida. Iha fulan neen dahuluk iha ezekusaun 32% de’it, ida-ne’e kii-liu,” Diretór Ezekutivu FONGTIL, Valentim da Costa Pinto, hateten ba Agencia tatoli, iha Caicoli, tersa ne’e.
Ministériu sira balun iha orsamentu kiik, maibé seidauk halo ezekusaun di’ak ba orsamentu ne’ebé prevee iha OJE 2024 nian, tanba la hare ba nia kna’ar no programa prioridade sira.
“Ita lahare ba kna’ar (programa) ida-idak nian, atu halo saída no iha ne’ebé. Ida-ne’e mak afeta tebe-tebes ba kualidade ezekusaun orsamentu ne’e kiik,” nia hateten.
Ezemplu, nia dehan, iha problema sosiál bara-barak ne’ebé Governu bele halo ezekusaun ba iha orsamentu hanesan saúde ne’ebé daudaun ne’e falta ai-moruk no rekusru umanu liuliu profisionál sira atu atende pasiente sira.
“Iha Ministeriu Saúde prosesu akizisaun ba ai-moruk ladún loos, osan kiik no la gasta, entaun afeta ba servisu no tratamentu ka atendimento ba iha sosiedade iha fasilidade saúde sira,” nia fó ezemplu.
KestaunGovernu nia ezekusaun OJE 2024 ne’e kiik, tanba iha Timor-Leste ne’e iha problema dezeña priodade sira no iha nesesidade kompleta estrutura serbisu.
Ezekusaun orsamentu iha temestre dahuluk ba tinan ida-ne’e laiha balansu, tanba ezekusaun ba saláriu boot-liu ba Kapitál Dezenvolvimentu.
“Osan ne’ebé seluk ba funsionariu sira-ne’e boot ne’ebé afeta ba rekursu Estadu nian. Osan ne’ebé seluk de’it funsionariu sira hanesan dispensa la produtivu,” nia dehan.
Diretór ne’e sujere, di’ak-liu Governu investe iha setór produtivu atu labele dependénsia ba importasaun.
Jornalista : Jesuína Xavier
Editór : Cancio Ximenes
