DILI, 22 jullu 2024 (TATOLI)- Komisaun E trata asuntu Enfraestrutura iha Parlamentu Nasionál (PN) hala’o ona konsultasaun públika ba proposta lei númeru 9/VI (1a) halo ona konsultasaun públika ba proposta-lei Medida Tutela Legalidade iha munisípiu ha’at hanesan Manufahi, Covalima, Baucau no Ermera.
Notísia relevante: https://tatoli.tl/2024/05/06/meza-pn-baixa-proposta-lei-medida-tutela-legalidade-Urbanístika-ba-komisaun-e/
“Ami halo ona konsulta públiku ba munisípiu ha’at ramata ona, agora tama resesu, entaun sei para no resesu hotu tiha ami tama fali sei kontinua ba munisípiu seluk ne’ebé seida’uk to’o,” Prezidente Komisaun E, Marcos Xavier, informa ba Ajénsia TATOLI iha resintu PN, segunda ne’e.
Razaun komisaun hala’o konsultasaun públika ne’e tanba lei ne’e importante hodi autoridade lokál sira fó sira-nia hanoin oinsá lei ne’e abanbainrua aprova karik bele implementa laiha problema.
Nune’e objetivu mak ema hotu-hotu partisipa ba elaborasaun lei ne’e no iha konsultasaun komisaun hato’o kona-ba esbosu proposta-lei ne’e no iha rekomendasaun barak husi autoridade lokál sira, maibé bainhira finaliza konsultasaun iha munisípiu hotu mak komisaun sei hato’o ninia relatóriu finál
“Konteúdu husi proposta-lei Médida Tutela Urbanístika ne’e atu regula sidadaun sira katak, hanesan foin daudaun ita haree Sekretária Estadu Asuntu Toponímia Organizasaun Urbana (SEATOU) nia sobu fatin espasu públiku sira, ho ida-ne’e mak ita-nia sidadaun sira atu halo konstrusaun uma karik husi estrada ba uma no husi tasi-ibun mai iha uma ne’e metru hira, ne’ebé ko’alia liu ba lisensa konstrusaun,” nia hateten
Aleinde, se sidadaun ida harii nia uma karik labele tama iha área risku se udan mai tama iha risku ba inundasaun maka lei ida-ne’e abanbainrua sei regula hodi nune’e komunidade sira konstrui uma tuir regra ne’ebé iha.
“Se lei ne’e abanbainrua aprova ona iha Parlamentu, depois haruka ba Governu ezekuta mak sei prevene ema la halo ona uma iha valeta leten, mota laran, no fatin risku dezastre ne’ebé lei ne’e importante,” nia dehan
Proposta-lei ne’e iha artigu hamutuk 18 maibé depende bele aumenta liuhusi konsulta públiku agora hala’o hela.
Jornalista: Nelson de Sousa
Editór: Rafael Ximenes de A. Belo
