BAUCAU, 23 jullu 2024 (TATOLI) – Ministru Defeza Kontra Almirante, Donanciano Costa Gomes Pedro Klamar Fuik, dehan forsa komponente terrestre sei hasoru difikuldade ba lojístika, jestaun administrasaun, fasilidade no transporte.
“Ohin ha’u halo vizita ida mai Komponente Terrestre, iha vizita ne’e ha’u identifika katak sira (Komponente Terestre) enfrenta problema balun hanesan jestaun administrativa, ekipamentu individu, transporte sira ne’ebé sira atu uza, nune’e mós apoiu lojístiku balun ne’ebé mak sira presiza atu bele torna ba sira-nia estrutura hodi sai efikasia no mais efetivu”, Klamar Fuik hateten ba jornalista sira hafoin halo vizita dahuluk ba Komponente Terestre Baucau, tersa ne’e.
Governante ne’e dehan, iha organizasaun ida mosu, akontese mós difikuldade sira, ida-ne’e normál, maibé kompromete katak sei dezenvolve komponente terestre tuir objetivu estratéjiku militár nian iha faze primeiru, segundu no terseiru ne’ebé previstu ona iha IX Governu Konstituisionál.
Nia esplika, iha program dezenvolvimentu estrátejiku militár nian iha faze dahuluk mak koalia kona-ba formasaun ba komponente sira terrestre, komponente navál, komponente Aéro inklui Autoridade Marítima. Daruak mak estratejia militár nian mak operasionaliza komponente tolu inklui Autoridade Marítima no datoluk kona-ba sustenta autoridade tolu inklui autoridade marítima.
“Ita haree fila fali iha primeiru estratéjiku oinsá mak ita kapasita komponente terrestre, liuliu haree ba dezenvolvimentu komponente terrestre bazeia ba konseitu estratéjiku militár ne’ebé mak define katak Timor-Leste sei iha forsa ida ki’ik, forsa ida efetivu no proporsionál”, nia afirma.
Klamar Fuik dehan, forsa ida kii’k signifika katak forsa ida ne’ebé bele evului to’o kapasidade ema hira, haree ba ita-nia kuantidade demografia, haree ba ita-nia dimensaun jeográfika no haree ba kapasidade ekonómika.
“Ita bele fó definisaun katak ita-nia forsa sira agora daudaun ne’e ita 3.600 no ita hakarak dezenvolve ita-nia forsa husi 3.600 ne’e ba to’o 5.600 no prioridade husi númeru 5.600, ita hakarak ita-nia efetivu komponente terestre ne’e iha 3.600”, nia adianta.
Mandatu Ministru Defeza nian mak sei haforsa liután komponente terestre ba forsa brigada no forsa ida ne’ebé forte liuhusi fó kapasitasaun ba sira fó ekipamentu materiál armamentu nian no kapasita sira iha lojístika atu bele afirma komponente ida-ne’e hanesan komponente estratéjiku no forsa ida ne’ebé mak modernu.
“Prioridade ida ba Ministériu Defeza mak atu haree komponente terestre sai hanesan forsa F-FDTL nia komandu estratéjiku. komponente terrestree sei hetan prioridade atu dezenvolve di’ak liután para bele sai forsa ida ne’ebé mak moderna, forsa ida ne’ebé mak profisionál atu bele sai forsa ida ne’ebé mak multiplikadór, kuandu ita hasoru kazu iha situasaun ne’ebé mak ita hakarak forsa ida-ne’e mak sei habelar nia kbi’it iha territóriu tomak”, Falur konklui.
Jornalista: Natalino Costa
Editór : Zezito Silva
