BAUCAU, 23 jullu 2024 (TATOLI) – Ministru Defeza Kontra Almirante, Donanciano Costa Gomes Pedro Klamar Fuik, hateten Ministériu Defeza, tinan ne’e, sei koalia ho Komandu F-FDTL atu halo fali manutensaun ba Ró Militár Jaco.
“Ita iha Ró Militár ba klase Jaco no Betano. Iha tinan rua ba kotuk, empreza halo ona manutensaun ba ró rua ne’e. Ró ida klase Betano mak empreza konklui ona nia manutensaun enkuaatu ró ida klase Jaco ne’e empreza lakonsege konklui nia manutensaun tanba kapasidade empreza nian no empreza hakarak tán osan mak foin konklui ró ida Jaco ne’e. Maibé Governu deside labele kontinua situasaun ida-ne’e”, Pedro Klamar Fuik dehan hafoin vizita hodi observa direta kondisaun ró militár Jaco iha tasi ibun área Metinaro nian iha tersa, ohin.
Klamar Fuik sei koalia ho Xefe Estadu Maiór Jenerál F-FDTL atu bele buka fali empreza seluk hodi bele konklui tiha ró klase Jaco.
“Ha’u hanesan Ministru Defeza sei koalia ona ho Xefe Estadu Maiór Jenerál F-FDTL para halo revizaun fila fali ba situasaun ida-ne’e, karik nesesáriu, bele halo revizaun ba kontratu ida ne’ebé mak eziste hodi bele revee fali para depois ita halo fila fali prosesu manutensaun como deve ser bele konklui ró militár ne’e”, nia revela.
Nia dehan, manutensaun ba Ró Jaco no Betano, antes ne’e, Governu anteriór prevee orsamentu ho montante millaun $2 no manutesaun ró halo iha Timor-Leste.
Rekorda fali katak manutensaun ba ró militár ho klase Jaco no Betano ne’e, hahú iha VIII Governu Konstitusionál no manutensaun ba ró militár rua ne’e halo husi Empreza Indonézia ho naran Wikas.
Jornalista: Natalino Costa
Editór : Zezito Silva
