UNICEF iha kompromisu kontinua apoia TL kombate má nutrisaun
DILI, 23 jullu 2024 (TATOLI) -Reprezentante Fundu Nasaun Unida ba Labarik (UNICEF-sigla inglés) iha Timor Leste, Patrizia Digiovanni, hasoru malu ho Prezidente Repúblika, José Ramos Horta, hodi hato’o kompromisu kontinua apoia rezolve problema labarik sira nian iha Timor-Leste.
“Ha’u mai hasoru malu ho Prezidente Repúblika, atu hato’o buat balun ne’ebé importante, liuliu kona-ba situasaun no kontinua apoia labarik sira iha Timor Leste, hanesan ma nutrisaun, stunting, no dezenvolvimentu labarik no mós edukasaun, ida ne’e mak diskute ona ho Prezidente,” Reprezentante UNICEF Dizlovanni katak ba jornalista sira hafoin enkontru ho Xefe Estadu iha Palásiu Prezidensiál Dili, tersa ne’e.
Durante enkontru Prezidente Repúblika mós prontu atu fó apoia ba hanoin UNICEF nian ne’ebé atu koopera hamutuk Governu, liu-liu oinsa atu jere problema ba labarik sira iha Timor-Leste.
“UNICEF nia misaun iha Timor-Leste mak prontu fó apoiu ba Governu Timor -Leste, liu-liu matéria sira ne’ebé relasiona ho asuntu labarik nian, durante ne’e ami fó apoiu tékniku no mós apoiu finanseiru,” nia dehan.
Nia esplika apoiu tékniku ne’ebé UNICEF fó mak hanesan hasa’e kapasidade komunidade Timor-Leste nian.
“UNICEF mós iha ona planu anuál ne’ebé asina ona ho Governu Timor-Leste, tanba ne’e iha enkontru ohin, ha’u hanesan ema foun iha ne’e, no ha’u aprezenta ha’u-nia aan ba Prezidente, atu nune’e bele hadi’a relasaun kooperasaun ho Prezidente atu haree hamutuk no bele apoiu problema labarik sira iha Timor-Leste,” nia hakotu.
Jornalista: Hortencio Sanchez
Editór: Florencio Miranda Ximenes
