Xefe Estadu husu MJ-PGR atu dezenvolve setór justisa ho di’ak
DILI, 23 jullu 2024 (TATOLI) – Prezidente Repúblika, José Ramos Horta, husu ba Ministru Justisa, Sergio Hornai no Prokuradór Jerál Repúblika (PGR,sigla Portugés), Alfonso Lopes, atu servisu ho resposabilidade ba dezenvolvimentu setór Justisa iha Timor-Leste.
Xefe Estadu hato’o asuntu ne’e bamhira Ministru Justisa, ne’ebé akompaña husi Prokuradór Jerál Repúblika (PJR), tersa ne’e, hasoru malu ho Prezidente Repúblika, hodi relata progresu servisu justisa no situasaun rai laran no husu mós Xefe Estadu nia hanoin atu dezenvolve setór justisa ba oin.l
“Ami mai hasoru Prezidente Repúblika atu informa situasaun ne’ebé relasaun ho setór justisa ne’ebé mak daudaun ne’e la’o hela no preparasaun ba oin, saida mak atu konsolida ba ita nia setór justisa ida bele di’ak liu iha nivél desizaun polítika no servisu tékniku no jurídiku nian liuliu iha Prokuradór Jerál Repúblika,” Ministru Sergio hateten ba jornalista sira iha Palásiu Prezidensiál Dili, tersa ne’e.
Governante ne’e, presiza servisu hamutuk entre Prezidente Repúblika ho Governu atu fó hanoin ba malu iha kestaun abordajen polítika nian.
“Prezidente Repúblika hanesan ema primeiru Majistradu Repúblika ida ne’e nian, ita mai husu nia hanoin balun atu fó mai ami konforme ita nia konstituisaun iha atu iha konsolidasaun Estadu nian,” nia hateten.
Prezidente Repúblika kontinua fó hanoin ba MJ oinsá atu haree ba relasaun bilaterál, multilaterál liuliu Timor-Leste prepara hela atu adere ba ASEAN no daudaun ne’e tama ona ba Organizasaun Mundiál Komérsiu (OMK) bainhira problema balun mosu Governu tenke haree situasaun hotu ho kbi’it no kapasita tuir koordenasaun institusionál Estadu nian.
“Prezidente Repúblika orienta mós ami liuliu ha’u hanesan ezekutivu, atu servisu ho di’ak atu haree prosesu hotu iha setór Justisa ba oin, atu dezenvolve setór ne’e di’ak liutan,” nia tenik.
Jornalista: Hortencio Sanchez
Editór: Florencio Mirand Ximenes
