Bainhira IX Governu halo auditoria ba governu anteriór, Taur la iha objesaun

DILI, 24 jullu 2024 (TATOLI) – Eis-Primeiru-Ministru VIII Governu Konstitusionál, Taur Matan Ruak, hateten, koopera bainhira IX Governu ne’ebé lideradu Kay Rala Xanana Gusmão atu halo auditoria.

 “Auditoria ne’e prosesu ida normál, ne’ebé laiha problema,” Antigu Prezidente Repúblika Taur Matan Ruak hateten ba jornalista sira iha Kantina Matak Palásiu Prezidensiál Dili, kuarta ne’e.

Tanba ne’e, Taur husu ba Governu atuál atu halo duni auditoria ba saida mak VIII Governu halo ona iha tinan-lima ba kotuk.

“Se Governu ida ne’e sente dúvida, sente iha problema bele halo duni auditoria, ne’e normál,” líder ezekutivu Governu Konstitusionál da-ualu ne’e énfaze.

Taur hasai pozisaun ne’e liga ba deklarasaun ne’ebé antes ne’e Xefe Governu Kay Rala Xanana Gusmão hasai ona ba públiku atu halo auditoria internasionál ba servisu hotu ne’ebé VIII Governu halo ona durante mandatu liuliu iha sistema finanseiru.

Kona-ba Xanana Gusmão nia krítika ba Governu dala-ualu muda hotu sistema finansa, Jenerál ne’e lakohi atu fó komentáriu.

Nia dehan tan bainhira tinan oin Governu halo duni auditoria prontu kolabora hotu tulun prosesu hotu. “Timoroan, ha’u kolabora, laiha ida atu sees aan atu nega,” nia hakotu.

Iha okaziaun ne’e, Xefe Estadu José Ramos Horta fundamenta deklarasaun Kay Rala Xanana Gusmão nian kona-ba auditoria ho maneira atu hatene kona-ba problema ne’ebé VIII Governu kria.

“Tuir Maun Xanana nia deklarasaun ba auditoria ne’e atu hatene los problema saida mak antes ne’e iha. Ida ne’e la’ós atu halo presegisaun polítika no oinsa Governu foun ne’e atu komprinde didi’ak kona-ba sistema ne’ebé muda iha Governu anterior ne’e,” Ramos Fundamenta.

Jornalista: Hortencio Sanchez

Editór: Rafael Ximenes de A. Belo