DILI, 24 jullu 2024 (TATOLI)– Embaixada Malázia koopera hamutuk Servisu Global Edukasaun Malázia (EMGS) no reprezentante universidade sira, ohin (24/07/2024) organiza sesaun informativa (briefing) ida ba kandidatu bolseiru FDCH sira kona-ba Estudu iha Malázia ba estudante sira.
“Ita iha bolseiru 33 pessoas ne’ebé sei aranka ba Malázia, antes atu ba Malázia ita presiza kolabora ho Malázia oinsá apply Viza, no lalaok iha ne’ebá. Iha universidade rua mak, Asia Pacific University ho Petronas university mak bolseiru sei estudu iha ne’ebá,” Profesionál Espesialidade Apoiu Direita ba Diretór Ezekutivu FDCH, Ermenegildo da Silva, hateten, hafoin partisipa iha marjen sesaun ne’e iha Suai Room, Timor Plaza, Dili, kuarta ne’e.
Nia hatutan IX Governu Konstituisionál tau save prioridade ba setór dezenvolvimentu sira iha Timor-Leste.
“Prioridade ba dezenvolvimentu iha ita-nia país, liliu área enjenária tanba ita hatene katak ita mós sei dada óptiku mai Timor-Leste, entaun ho ida-ne’e bele responde asuntu ida-ne’e. Nune’e ida-ne’e sai prioridade hodi ita forma ema hodi atende. Iha inísiu setembru ita bele lori sira bá universidade rua referidu,” nia dehan.
Iha tinan-2024, FDCH tau osan miliaun $1.5 ba programa bolseiru nian inklui ona ba bolseiru Tailándia, Brasil, Portugal no mós Indonézia no nasaun seluk tan.
Counsellor of the Embassy of Malaysia, Nadia Azura Mohd Nudri, dehan, EMGS Education Malaysia Cooper Services no mós universidade balun husi Malázia atu mai iha universidade ne’e hodi fó memoria nível primeiru ba kandidatu bolseiru sira, segundu mak bolsu Estudu iha Malázia State ba estudante finalista sira husi eskola.
“Ohin ami hasoru malu ho estudante sira ne’ebé hakarak kontinua sira nia estudu iha Malázia. No aleinde ida-ne’e, ami planeia no haree oportunidade saida maka iha ba ideia kooperasaun sira entre universidade sira mós. Entaun ida husi objetivu sira seluk husi universidade sira ne’ebé prezente mak atu haree oinsá sira bele kolabora ho Ministru Ensinu Superiór, Siénsia no Kultura no mós UNTL no ninia programa sira kona-ba eksentrisidade aziátiku sira. Ne’e maka foku ida ba dedikasaun iha tempu ida-ne’e,” nia dehan.
Partisipante sira ne’e mak sai futuru arte no líder sira nune’e atu hatene barak liután kona-ba prosesu no mós oportunidade sira atu kontinua estuda iha Malázia. “No ohin ami haksolok atu simu delegasaun ida husi Malázia”.
EMGS hanesan ajénsia ida iha Ministériu Ensinu Superiór ka Ensinu Superiór nia okos ne’ebé sei ajuda estudante sira ba Malázia oinsá atu bá estuda iha universidade no mós lori universidade sira atu mai hodi promove oportunidade atu estuda iha Malázia.
“Nune’e ami introduz fundasaun estudante voluntáriu para ami bele liga ho parseiru lokál sira, mak hanesan estudante ka estudante sira iha universidade hamutuk ho ami iha ona fundasaun estudante voluntáriu atu hamutuk planeia programa voluntáriu ba estudante Timor-Leste, nune’e mós estudante Malázia ne’ebé sei implementa iha futuru. Entaun dala ida-ne’e ami iha ramu barak ne’ebé ami aprezenta, mak hanesan promosaun Malázia nian no mós fundasaun estudante voluntáriu,” nia hatutan.
“Ami fó briefing ida kona-ba oinsá atu estuda iha Malázia, oinsá estudante sira bele aplika ba vistu estudante, saida maka estudante sira presiza atu prepara, no tuirmai programa saida maka disponível iha Malázia. Aleinde ne’e, ami mós ohin loron, ami lori Yayasan Sukaran Lansiswa mai hamutuk kria programa voluntarizmu iha Timor-leste. No mós ami hamutuk ho FDCH atu ajuda FDCH hodi identifika programa adekuadu atu bele fó ba estudante Timor-leste hodi kontinua sira nia estudu iha Malázia”, nia reitera.
To’o ohin loron, maizumenus estudante na’in 60 husi Timor-leste ne’ebé kontinua sira nia estudu iha Malázia. No tinan-tinan iha aumentu. Tinan ida ne’e, iha aplikasaun hamutuk 25 husi estudante Timor-Leste atu estuda iha Malázia.
Jornalista: Osória Marques
Editór: Rafael Ximenes de A. Belo
