DILI, 24 jullu 2024 (TATOLI) – Programa Monitorizasaun Sistema Judisiária (JSMP, sigla inglés) servisu hamutuk ho USAID liuhusi programa Accountability and Integrity Mechanism hodi fasilita formasaun ba Sosiedade Sívil no jornalista sira atu kontribui hodi prevene no kombate korrupsaun iha Timor-Leste.
Formasaun ne’e hala’o durante loron rua, hahú kuarta no termina iha kinta feira aban. Materia ne’ebé sei koalia iha formasaun ne’e kona-ba makanizmu akuntabilidade kona-ba utilizasaun osan Estadu ho responsablidade .
“Ita-bo’ot sira hatene programa Accountability and Integrity Mechanism ita lansa ona iha fulan hirak liu ba no USAID servisu hamutuk ho JSMP liuhusi programa Accountability and Integrity fasilita formasaun ba sosiedade sivil sira ne’ebé mak eziste no jornalista atu ita ba kontribui hodi prevene liután hahalok korrupsaun iha Timor-Leste”, Diretora Ezekutiva JSMP, Ana Paula Marçal ba jornalista iha Timor Plaza, kuarta, ohin.
Nia afirma, kombate korrupasaun nu’udar responsabilidade ema hotu nian, tanba ne’e, husu ba sosiedade sívil, jornalista sira no entidade hotu atu luta hamutuk hodi kontra korrupsaun.
“Atu kombate korrupsaun iha Timor-Leste laos ema ida ka rua nia responsablidade, maibé ita hotu nia responsablidade. Tanba ne’e ami husu ba maluk sosiedade sívil tomak, jornalista no entidade sira hotu atu hamutuk ho luta kontra korrupasaun”, nia adianta.
Paula hateten, koalia kona-ba akuntabilidade, tempu ona institusaun hotu tenke uza osan Estadu tuir nesesidade instituisaun nian, labele naran gasta de’it osan.
“Tanba ne’e mak liuhusi formasaun ida, ami bele tau hanoin hamutuk sá maneira di’ak para ita atu hodi prevene korrupasaun”, nia afirma.
Peskizadór JSMP Luis Oliveira Sampaio, realsa, atu prevene korrupsaun iha Timor-Leste, maneira ne’ebé di’ak mak haforsa servisu Komisaun Anti-Korrupsaun no implementa lei sira ne’ebé iha ne’e tenke sériu.
“Ita iha kondisaun atu prevene krime korrupasaun sira, ida mak ita iha lei ne’ebé mak sufisiente atu proibi ema labele halo krime korrupsaun no ida seluk mak ita tenke apoia servisu Komisaun Anti Korrupsaun ho másimu labele infrakeza nia servisu. Instituisaun Estadu sira no autór judisiária sira hanesan Ministériu Públiku ne’ebé hanesan na’in ba asaun penál tenke kolabora ho CAC nia servisu,” nia afirma.
Nia dehan, tuir monitorizasaun ne’ebé JSMP nota katak dalaruma kazu koorupsaun pendente tanba CAC remete ba Ministériu Públiku dalaruma konklui ona prosesu maibé dalaruma laharuka lalais ba Tribunál Judisiál Primeira Instánsia.
“Maibé husi parte JSMP kontinua husu nafatin atu autór judisiária sira ne’e koopera malu hodi ita bele kombate korrupsaun iha ita-nia rai doben ida-ne’e”, nia subliña.
Iha fatin hanesan, Xefe USAID iha Timor-Leste, Gerald Mosquera, hateten programa Accountability and Integrity ne’e importante tanba atu fó formasaun ba ema atu konsiensializa sidadaun kontribui hodi prevene korrupsaun.
“Timor-Leste nia komitementu ba kombate korrupsaun ne’e di’ak tebes no utilizasaun osan sira iha institituisaun Estadu transpante tebes no garante ba boa governansaun, maibé ha’u espera ho programa Accountability and Integrity bele fasilita hodi prevene korrupasaun iha Timor-Leste ho di’ak liután”, nia dehan.
Jornalista: Natalino Costa
Editór : Zezito Silva
