Veíkulu 221 iha RAEOA tama iha prosesu leilaun
OÉ-CUSSE, 24 Jullu 2024 (TATOLI) – Ministériu Finansa (MF) no Autoridade Rejiaun Administrativa Espesiál Oé-Cusse Ambeno (RAEOA) halo abertura ba leilaun faze XVI B ba patrimóniu Estadu hamutuk 221, ne’ebé kompostu husi karreta 14 no motorizada 207, tanba prienxe ona limitasaun ba utilizasaun nesesidade Estadu nian.
Diretora-Jerál Interina Patrimóniu Estadu MF, Timotea Pompeia Marques, informa katak leilaun ne’ebé halo iha Oé-Cusse ne’e, iha modalidade rua, konkursu públiku atu benefísia ba públiku sira husi Oé-Cusse oan atu tuir kompetisaun no konkursu internu ba funsionáriu permanente sira atu kompete iha prosesu ida-ne’e.
“Konkursu públiku halo ba karreta unidade 14 no motorizada 10 no konkursu internu ba de’it motorizada hamutuk unidade 197, ne’ebé totál mak karreta 10 no motorizada 207”, nia hateten iha otél Ambeno, ohin.
Nia hateten leilaun iha RAEOA ne’e nia prosesu integradu tanba hala’o ona iha 2023, maibé RAEOA nian pendente tanba konfirmasaun ba preparasaun téknika sira, nune’e iha 2024 ne’e mak foin realiza.
“Ne’e programa integradu ba iha jestaun patrimóniu Estadu nian atu asegura kondisaun bens no móveis Estadu nian. Sira-ne’ebé prienxe ona rekizitu ba leilaun iha ona períodu limita ba utilizasaun no ita hakarak redús kustu manutensaun no reparasaun ne’ebé iha”, nia salienta.
Notísia relevante: MF introdús matéria haat iha Oé-Cusse bá polítika jestaun patrimóniu Estadu
Tanba ne’e, Timotea Marques espera katak prosesu ba leilaun iha Oé-Cusse tuir estimativa aprezentasaun bele hetan reseita ba kofre Estadu rihun $120-resin.
Iha biban ne’e, Diretór Rejionál Patrimóniu Estadu Oé-Cusse, Gonçalo dos Remédios, fó sai totál rekerente hamutuk 202 mak hatama formuláriu ba konkursu internu ba leilaun motorizada 197 no ba konkursu públiku iha formuláriu 17 mak atu kompete ba leilaun ba karreta 14 no motorizada 10.
“Presu ne’e sira komisaun husi nasionál mak prepara iha nia kontajen ketak. Ami sei halo tan evaluasaun ba presu sira-ne’e bazeia ba utilizasaun tinan hira nian no valór momentu foin sosa ne’e”, nia esplika.
Notísia relevante: Funsionáriu iha papél proteje patrimóniu Estadu hodi servi povu
Jornalista: Abílio Elo Nini
Editora: Maria Auxiliadora
