DILI, 25 jullu 2024 (TATOLI) – Empreza Estadu Indonézia (BUMN) ho naran BRI (Bank Rakyat Indonesia) hamutuk ho Administrasaun Aeroportu no Navegasaun Aérea Timor-Leste (ANATL), ohin, halo lansamentu ofisiál ba kartaun BRIZZI hodi fornese konveniente servisu pagamentu nian ho efisiente liu iha estasionamentu Aeroportu Internasionál Prezidente Nicolau Lobato (AIPNL).
Lansamentu BRIZZI ne’e hala’o diretamente husi Jerente Jerál BRI, Roby Firmansyah Sastraadmadja, Prezidente ANATL, Romualdo da Silva, Adjuntu Deputadu Banku Sentrál Timor-Leste (BCTL), Rafael Borges, Embaixadór Repúblika Indonézia ba Timor-Leste, Okto Dorinus Manik no Ministru Transporte no Komunikasaun, Miguel Marques Manetelu, iha salaun VIP, AIPNL, kinta-feira.
Roby, hateten BRIZZI hanesan osan eletróniku ne’ebé fó sai husi Banku BRI, ne’ebé dezeña atu fasilita ema atu hala’o tranzasaun osan ho seguru, lalais no efisiente, hamenus dependénsia ba osan, aumenta konveniénsia.
“Iha BRIZZI, ami hala’o inisiativa inisiál ida-ne’e ho kolaborasaun ho ANATL, liuliu iha AIPNL, ami hahú ho fornese servisu pagamentu dijitál iha área aeroportu uluk, hanesan pasu dahuluk hodi introdús uzu osan eletróniku iha Timor-Leste, entaun ami fiar katak kolaborasaun ne’e sei la’ós de’it hasa’e efisiénsia operasionál iha aeroportu, maibé mós aselera adosaun tranzasaun dijitál sira”, Jerente Jerál BRI dehan iha VIP aeroportu, ohin.
Nia fiar katak BRI kompromete atu servisu hamutuk ho BCTL hodi enkoraja inkluzaun finanseira no mós fornese edukasaun ba públiku kona-ba benefísiu no utilizasaun osan eletróniku ne’ebé ikus mai sei apoia kreximentu ekonómiku no hasa’e kualidade moris povu iha Timor-Leste.
Iha fatin hanesan, Prezidente ANATL, Romualdo da Silva, hateten lansamentu BRIZZI ne’e bele garante liután servisu tranzasaun ne’ebé prátiku, seguru no efisiente ba vizitante hotu iha AIPNL, bainhira uza estasionamentu.
“Ida-ne’e sei ajuda ami-nia kliente sira atu sai efisiente liután hodi selu ba estasionamentu. Só ho kartaun BRIZZI hanesan osan eletróniku ne’ebé bele aumenta iha BRI sei halo buat sira sai fasil liu ba ami-nia kliente sira. Hahú ohin ita sei kontinua halo teste no sei uza ofisialmente iha loron 1 fulan-Agostu”, nia dehan.
Embaixadór Repúblika Indonézia ba TL, Okto Dorinus Manik, fiar katak kolaborasaun ne’e konkretu no inovasaun pagamentu ne’e hanesan pasu ida tan hodi hametin sistema dijitalizasaun pagamentu.
“Ita hein katak ohin loron kompromisu ba kooperasaun ida-ne’e bele dezenvolve sai pilotu dezenvolvimentu sistema pagamentu iha fatin negósiu sira seluk iha TL”, Embaixadór Okto dehan.
Ministru Transporte no Komunikasaun, Miguel Marques Manetelu, subliña katak Governu Timor-Leste kontinua esforsu aan atu harii infraestrutura ne’ebé nesesáriu, liuliu ba konetividade servisu bazeia ba dijitál (Internet), enkoraja implementasaun Governu eletróniku no komérsiu, pagamentu dijitál, banku dijitál, Internet of Things (IoT), Intelijénsia Artifisiál (IA), Ekonomia Dijitál no seluk tan.
“Ida-ne’e atu garante kompetitividade iha Timor-Leste nia preparasaun ba adezaun permanente iha ASEAN no OMK. Obrigado ba banku BRI, ANATL no klaru ba BCTL ne’ebé ajuda prosesu ne’e la’o ho di’ak, espera katak tipu pagamentu eletróniku ida-ne’e sei dezenvolve nafatin ba nesesidade servisu iha ajénsia Governu sira seluk”, Ministru Miguel afirma.
Hafoin lansamentu direta iha sala VIP, kontinua manifestasaun direta kona-ba utilizasaun Osan Eletróniku BRI BRIZZI iha área estasionamentu AIPNL nian.
Iha Indonézia, kartaun BRIZZI introdús husi Banku Rakyat Indonézia (BRI) iha tinan 2017. Lansamentu ofisiál ba kartaun ne’e hala’o atu bele fó apoiu ba programa Governu nian hodi kria sosiedade ida ne’ebé laiha osan. Hahú husi ne’ebá, BRIZZI sai hanesan solusaun pagamentu eletróniku ida ne’ebé uza barak iha Indonézia, hanesan pagamentu ba transporte públiku, taxa pedájiu, estasionamentu no tranzasaun iha komersiante sira.
Jornalista : Felicidade Ximenes
