DILI, 25 jullu 2024 (TATOLI) –Ministru Negósiu Estranjeiru no Kooperasaun (MNEK), Bendito Freitas, partisipa iha sesaun daruak enkontru ‘ASEAN Ministerial Meeting (AMM)’ ba dala-57, hodi akompaña aprezentasaun relatóriu kona-ba Komisaun direitus umanu ASEAN nian iha rejiaun Ázia.
Reuniaun AMM ba dala-57, ne’e realiza iha Vientiane, Repúblika Demokrátika Popular Laos, foin lalais ne’e.
Durante sesaun daruak ne’e, Komisaun Direitu Umanu husi organizasaun rejionál ASEAN, aprezenta relatóriu servisu kona-ba kondisaun direitu umanu iha rejiaun ázia no mós violasaun ba direitu umanu iha Myanmar.
“Iha parte segunda sesaun nian ko’alia mós komisaun ASEAN nian kona-ba direitu umanu ne’ebé husi reprezentante hosi komisaun direitu umanu nian husi ASEAN hato’o relatóriu kona-ba situasaun direitu umanu iha rejiaun, liu-liu mós situasaun iha Myanmar, iha fatin barak,” Ministru Bendito hateten, liuhusi nota ne’ebé Agência TATOLI asesu husi media MNEK, ohin.
Iha enkontru ne’e mós, Timor-Leste hato’o nia lian hanesan nasaun ida-ne’ebé iha esperiénsia rasik iha luta ba libertasaun nasionál, kona-ba situasaun no violasaun direitu umanu ne’ebé Timoroan sira hetan iha luta ba libertasaun nasionál durante tinan-24 nia laran.
“Ita mós hakarak partisipa ativamente no konstrutivamente iha situasaun ba fortalesimentu instituisoens ka mekanízmu atu bele presta servisu didi’ak ba área direitu umanu,” governante ne’e tenik.
Iha parte seluk, Ministru Bendito Freitas dehan, partisipasaun Timor-Leste nian iha enkontru AMM ne’e importante tebes tanba, Timor-Leste hela iha prosesu preparasaun ne’ebé tuir planu, Timor-Leste sei sai membru plenu ba ASEAN iha tinan-2025.
“Ita-nia esperansa katak, 2025 ne’e, ita bele tama ona ba membru plenu ba ASEAN ne’e, ninia prosedimentu mak ita hato’o karta de’it ba Ministru sira ASEAN tomak nia konkordánsia maka ne’e ona, ita sei tama bainhira Malázia mak sei sai hanesan Prezidénsia ba ASEAN,” nia dehan tan.
Alende ne’e, enkontru AMM refereridu hanesan enkontru nível Ministru Negósiu Estranjeiru sira-nian, nune’e bele prepara di’ak liután ba simeira Xefe Estadu no Xefe Governu ASEAN nian ne’ebé sei hala’o iha tempu-badak.
Entretantu, enkontru AMM ba dala-57 ne’e, Ministru Negósiu Estranjeiru no Kooperasaun, Bendito Freitas akompaña mós husi Vise-Ministra Asuntu ASEAN Milena Rangel, Embaxadór Timor-Leste iha Repúblika Demokrátika Popular Laos, Filomeno Aleixo, Embaixadora Timor-Leste ba ASEAN, Natércia Cipriana Coelho da Silva, Adjuntu Provedoria Direitu Umanu no Justisa (PDHJ), Rigoberto Monteiro no seluk tan.
Jornalista: Hortencio Sanchez
Editór: Rafael Ximenes de A. Belo
