VIQUEQUE, 25 jullu 2024 (TATOLI)- CARE Internasionál hamutuk ho parseiru organizasaun Banku Mundiál no autoridade munisípiu Viqueque vizita grupu agrikultór no grupu tein ai-han tradisionál sira iha suku Macadique, postu administrativu Uatulari.
CARE hamutuk ho ninia parseiru Banku Mundiál, organizasaun naun govermental Fundasaun Knua Haberan Komunidade (KHC) no Kruz Vermella Timor Leste (CVTL), vizita benefisiáriu projetu preparasaun emerjénsia saúde nian ne’ebé implementa iha suku Macadique.
“Ohin, ami vizita grupu sira iha suku Macadique, ho objetivu halo monitorizasaun atividade ne’ebé komunidade sira implementa haneasn projetu toos uma huun, haki’ak manu no te’in ai-han tradisionál ne’ebé uza produtu lokál sira. Ami observa komunidade sira implementa di’ak ba futuru ami sei kolabora ho parseiru sira hodi kontinua implementa”, Diretór CARE internasionál iha Timor Leste, Peter Goodfellow, hateten ba jornalista sira, iha sede suku Macadique, ohin.
Projetu emerjénsia saúde no nutrisaun ne’e, CARE apoia komunidade sira liuhusi kapasitasaun hanesan te’in ai-han nutrisaun ne’ebé produtu lokal hanesan feuk, talas, ai-farina, kumbili ba dose, no kuda modo no apoia manu hodi hasoru situasaun emerjénsia sira.
“Ha’u hanoin projetu ida-ne’e sai mós ezemplu ba komunidade seluk hodi implementa tuir. Tan ne’e ami sente projetu ne’e sai benifísia tebes ba komunidade sira, nune’e ba oin Governu Timor-Leste hodi kontinua implementa”, nia subliña.
Programa ne’e implementa ona durante tinan-tolu hahú tinan 2022 iha suku Macadique ho tarjetu implementa iha aldeia 8 ho totál benifisiáriu uma-kain 20.
Autoridade agradese ba CARE
Iha biban ne’e, Sekretáriu Asuntu Sosial munisípiu Viqueque, Acacio de Souza, motiva grupu benifisiáriu kontinua implementa programa ne’ebé apoia husi Care Internasionál tanba motiva komunidade sira hala’o atividade ortikultura, haki’ak manu no tein ai-han tradisionál.
“ Ha’u husu komunidade sira implementa atividade ortikultura no prepara ai-han tradisionál sira ba oan sira, labele hein de’it presenza parseiru sira-nian”, nia hato’o.
Entretantu, Xefe Suku Macadique, Afonso dos Reis, husu agradese ba parseiru CARE ne’ebé durante ne’e implementa atividade iha suku Macadique hodi hanorin komunidade sira halo atividade hanesan ortikultura no te’in hahan tradisionál.
“Ha’u husu agradese ba parseiru CARE ne’ebé fasilita ona ami-nia komunidade sira tanba ne’e ami husu nafatin CARE ba futuru nafatin apoia komunidade sira iha suku Macadique”. Nia prefere.
Iha oportunidade ne’e reprezenta Grupu Betulari, Merlinda Quebelem, hateten, parseiru CARE apoia tebes sira kona-ba atividade to’os iha uma-hun no apoiu fini modo musan ba komunidade sira hodi kuda sira-nia kintal.
“CARE mai ajuda ami oinsa halo to’os iha uma-hun, to’os uma-hun ne’e ami kuda modo oin-oin hanesan kankun, modo mutin, brinzela no tomante sira. rezultadu balun ami han no balu faan ba komunidade sira-ne’ebé presiza modo. Maske apoiu ba ami oituan, maibé ami sente agradese tanba bele motiva ami halo atividade ortikultura”, nia afirma.
Jornalista : Vitorino Lopes da Costa
Editór : Florencio Miranda Ximenes
