Fornesimentu bee HNGV estavel hafoin Empreza Startec hadia mákina
DILI, 25 jullu 2024 (TATOLI) – Vise Ministru ba Fortalesimentu Institusionál Saúde, José dos Reis Magno, dehan ema hotu preokupa kona-ba fornesimentu bee, horseik, iha Hospitál Nasionál Guido Valadares (HNGV), tanba mákina bomba bee avaria, maibé empreza Startec Enterprises, estabiliza ona mákina no fornesimentu bee normal hikas ona.
“Bee ne’ebé mak horseik falla ne’e, tanba mákina bomba bee mak fiu konslet iha rai okos, nune’e labele fornese bee ba opistál laran, entaun hosi ne’e ema hotu preokupa kona ba bee la iha, entaun ohin ha’u mai haree diretamente katak empreza hahú hadia ona mákina ne’ebé mak aat, troka fali foun nune’e fornese ona bee ba ospitál laran hanesan baibain”, José dos Reis Magno, informa ba jornalista sira iha HNGV, ohin.
Nia haktuir, hafoin mákina avaria horseik iha HNGV, hetan apoiu direta hosi bombeiru, Bee Timor Leste (BTL) hodi ense bee ba tanke no fornese bee ba ospitál laran.
“Agora daudaun empreza hamutuk ho ekipa HNGV, iha ona alternativu atu troka mákina aat hodi tau fali mákina foun atu fornese bee ba opsitál laran, tanba horseik to’o ohin loron iha HNGV hetan apoiu hosi bombeiru hosi BTL mai ense bee ba tanke hafoin fornese di’ak liután ba ospitál laran”, nia afirma.
Iha fatin hanesan, Diretora Administrasaun Finansa no Lojístika iha HNGV, Sara Maria Xavier, dehan informasanun ne’ebé mak espallha iha públiku katak fornesimentu bee ba HNGV ladún másimu no hetan problema uitoan tanba mákina bomba bee mak hetan avaria horseik iha tuku 14:00.
“Horseik ita troka kedas bomba bee ne’ebé avaria no troka kedas foun, maibé fornese bee ladún boot hanesan ida aat ona ne’e, tanba durante ne’e ita iha bomba bee rua, ida ho kapasidade 9 mill litru por oras ba produsaun bee, ida seluk ninia kapasidade 5,5 mill litru por oras, signifika nia volume kiik iha momentu ne’e”, Sara Maria Xavier relata.
Nia afirma, mákina bomba ne’ebé avaria, tanba ninia fiu mak hetan konslet iha rai okos, nune’e bee labele bomba hosi rai okos mai tanke ne’ebé mak HNGV prepara iha mortuariu kotuk.
“Entaun solusaun ne’ebé mak HNGV halo mak ita funsiona nafatin mákina bomba bee ida kiik, ida-ne’e mak ho ninia kapsidade ne’e 5,5 KWH, nia fornse nafatin bee ba ospitál laran tomak, maske ho volume ne’ebé mak kiik no ladún boot, hanesan mákina ida seluk ne’ebé mak hetan avaria”, nia haktuir.
Nia esplika, empreza hahú troka ona mákina avaria no tau mákina foun garante katak ba oin HNGV laiha problema ona ba bee moos.
“Ohin loron ita buka rezolve problema ne’e tanba ita garante katak bee ne’e bele funsiona nafatin hanesan baibain. Tanba mákina ne’e troka foun ba medida 4NG ho 7,5KWH ne’ebé mak prodús volume bee ne’e 11 mill litru por ora, ho ida-ne’e bele solusiona bee ba HNGV laran tomak”, nia esplika.
Diretór Empreza Estratec Enterprises, Kim Tchia hateten mákina ne’ebé avaria horseik, agora atu troka hodi fornese bee ho volume boot ba HNGV laran tomak.
“Bee ne’e sufisiente hela, maibé mákina aat no paradu iha oras rua ka tolu nia laran, entaun ha’u rasik ho ekipa sira ami rezolve ninia kanalizasaun ne’ebé atu ba tanke ne’e, maibé espalla iha media katak bee menus ne’e lalos, entaun agora ami atu troka mákina ne’ebé avaria nune’e tau fali mákina foun atu nune’e bee moos bele funsiona fila fali hanesan baibain”, Kim konklui.
Jornalista : Felicidade Ximenes
Editór : Zezito Silva
