DILI, 25 jullu 2024 (TATOLI) – Diretór Aprovizionamentu Institutu Nasionál Farmásia no Produtu Médiku (INFPM), Mariano da Silva Marques, hateten INFPM simu tan produtu médiku husi empreza importadór SaliMagu, Ortho Clinical Diagnostic no UNICEF.
“Ami simu fali, produtu médiku husi empreza importadór tolu, hanesan SaliMagu, Ortho Clinical no UNICEF, ba ai-moruk ne’ebé submete husi SaliMagu ne’e hatama hosi Indonézia, Ortho Clinical hosi Singapura,” dehan Diretór Aprovizionamentu INFPM ba TATOLI iha nia kna’ar fatin, Kampu Alor, ohin.
Nia esplika, produtu médiku ne’ebé entrega ba INFPM tuir duni kontratu sosa entre empreza importadór ho INFPM.
“Produtu ne’e entrega tuir kontratu entre Empreza ho INFPM, produtu médiku ne’e entrega ba ekipa resepsaun no inspesaun (R&I) hodi halo verifikasaun molok rai iha armajen INFPM hodi distribui ba sentru saúde idaidak”, nia dehan.
Produtu médiku sira ne’ebé hatama mak Injesaun Vitadion, Vasina ba epatite B ho vasina ba labarik, Vitros (Reajente), Ibuprofen 400 MG, Metromide tab, metroclopramide 10 mg tablet.
Jornalista : Felicidade Ximenes
Editór : Zezito Silva
