VIQUEQUE, 25 jullu 2024 (TATOLI)- Prezidente Autoridade munisípiu Viqueque (PAM), Francisco Cruz Simões de Gonzaga Soares, husu Agência TATOLI, Institutu Públiku, atu kontinua mellora servisu jornalizmu hodi kobre problem sosiál iha área rurál tanba jornalista hanesan matan, tilun no ibun ba komunidade lian la’ek sira-ne’ebé hela iha área rurál no remota sira.
“Ha’u-nia deseju ba Agência TATOLI,I.P ninia ezisténsia. Ba aniversáriu dala-ualu ne’e ha’u-nia esperansa katak TATOLI,I.P kontinua nafatin sai matan, tilun no ibun atu TATOLI sai lian ba komunidade sira-nia liuliu iha área rurál no remota ba nasionál, nune’e ukun na’in sira tau atensaun”, Francisco Cruz Simões de Gonzaga Soares, hateten ba Agência Tatoli, iha ninia kna’ar fatin, ohin.
TATOLI, I.P kontinua lori aspirasaun povu ki’ik sira nian lian ba nain-ulun sira, hodi bele haree no hadi’a povu nia moris iha área rurál atubele sente dezenvolvimentu iha Timor Leste.
“Ha’u sente prezensa TATOLI,I.P nian bele sai kontrolu sosiál hodi alerta ba ukun na’in sira, atu ukun-nain sira bele la’o tuir ho di’ak, hodi hala’o dezenvolvimentu”, PAM Viqueque espera.
Nune’e, nia dehan nu’udar autoridade munisípiu kontinua nafatin halo komunikasaun di’ak ho TATOLI, I.P no prontu apoia jornalista TATOLI,I.P tenke sai parseiru ba prosesu dezenvolvimentu nasaun Timor-Leste.
“Ha’u husu instituisuan TATOLI, I.P ne’ebé hanesan media Estadu nian presiza aumenta rekursu jornalista hodi koloka ba postu no área remota sira. Nune’e mós ha’u prefere ba instituisaun presiza apoia ekipamentu hanesan kamera, maibé liuliu transporte ba jornalista sira-ne’ebé destaka iha munisípiu. Tanba ha’u-nia akompañamentu durante ne’e jornalista sira halo servisu iha munisípiu kobre to’o ona iha área rurál no remota. Maibé, sira-nia esforsu maka foin bele to’o iha área remota, tan ne’e presiza fó apoia transporte hodi fasilita sira-nia servisu iha baze”, nia rekomenda.
Notisia relevante:PR Horta husu TATOLI hala’o servisu jornalizmu ho imparsiál
Jornalista : Vitorino Lopes da Costa
Editór : Florêncio Miranda Ximenes
