Projetu konstrusaun edifísiu foun INL iha UNTL atinje 22%
DILI, 26 jullu 2024 (TATOLI)–Projetu konstrusaun edifísiu foun Institutu Nasionál Linguístika (INL) iha Universidade Nasionál Timor-Lorosa’e (UNTL) atinje ona 22%.
Pró-Reitór ba Asuntu Dezenvolvimentu Institusional, Lelis Gonzaga Fraga, hateten, bazeia ba kontratu katak konstrusaun ne’e sei ramata iha novembru 2024.
“Tuir planu fulan-ida tenke atinje 40% nune’e ita bele ramata iha fim do ano ne’e, tanba bazeia ba tempu ne’ebé ita halo kontratu atu finaliza konstrusaun ne’e durante fulan-10,” Lelis Gonzaga Fraga, informa ba Agência Tatoli iha ninia knaar fatin, Liceu, sesta ne’e.
Notísia relevante : INL sei melhora di’ak liután tradusaun lian tétum iha Google tradutór
Projetu konstrusaun ne’e hahú iha fulan-fevereiru ne’e, maibé nia progresu la’o neneik, tanba ne’e Pró-Reitór husu ba empreza Dwiponggo, Bee Feto Kaduak, Tata JV, ne’ebé kaer projetu atu aselera lalais konstrusaun tuir kontratu ne’ebé iha.
“Kuandu ita haree iha nia progresu la’o ladún lalais, hanesan ne’e ita labele garante bele hotu iha fim do ano, dalaruma bele finaliza fali iha tinan oin, ne’ebé ita husu ba empreza ne’e tenke aselera lalais projetu tuir planu. Labele la’o tarde liu, iha difikuldade ruma ne’ebé karik sira hasoru tenke buka dalan atu rezolve lalais nune’e labele afeta ba konstrusaun referidu,” nia dehan.
Edifísiu foun ne’e kompostu husi sala hamutuk 12 inklui auditóriu ida.
“Pizu dahuluk ne’e iha sala hamutuk ualu no pizu daruak ne’e iha sala haat, depois iha mós auditóriu boot ida,” nia tenik.
Project Manager empreza Aji Ageng Riyadi, hateten, kontrusaun edifísiu la’o tarde tanba fatin atu rai sasán konstrusaun la sufisiente.
‘’Prosesu konstrusaun ne’e la’o tarde oituan tanba espasu la sufisiente atu rai materiál konstrusaun nian, entaun ami tenke muda fatin atubele rai materiál sira nune’e ami bele serbisu lalais no daudaun ne’e ami kesi ona besi sinta nian hein atu (cor) no nahe de’it ona, ami mós sei esforsu atu serbisu hodi bele ramata tuir termu kontratu ne’ebé iha ona,” nia tenik.
Jornalista : Osória Marques
Editora : Julia Chatarina
