KHK apoia materiál ba grupu ortikultura iha Uatulari
VIQUEQUE, 26 jullu 2024 (TATOLI)-Reprezentante Diretór Fundasaun Knua Haberan Komunidade (KHK) iha munisípiu Viqueque, Marito da Silva, hateten, KHK apoia materiál orikultura nian ba grupu rua husi suku Matahoi no Uaitame, postu administrativu Uatulari, munisípiu Viqueque.
Objetivu husi apoia ne’e, atu fasilita grupu sira hodi kanaliza bee ba rega modo tanba daudaun sira hala’o atividade kuda modo.
“Ami oferese apoia materiál ne’e ba ita-nia grupu sira, atu dezafia sira hodi kontinua implementa sira-nia atividade ortikultura tanba sira iha vontade halo serbisu, maibé durante ne’e sira hasoru problema bee ba rega modo. Ho nune’e maka ami fó sasán oituan ne’e ba sira hodi uza”, Marito da Silva, hateten ba jornalista sira, iha postu administrasaun Uatulari, ohin.
Marito relata, materiál ne’ebé oferese ba grupu Lemorai suku Matahoi no Grupu Hakbi’it Família (GHF) maka hanesan tanke bee, mangeira, pompa bee, gembor no seluk tán.
“Materiál sira-ne’e ami hetan husi parseiru gabineti Primeiru Ministru Apoiu Sosiadade Sivil hodi fó tutan ba ita-nia grupu sira. Maske ami fó oituan, maibé sei benifísia ba ita-nia grupu sira. Tan ne’e ami husu grupu sira uza ho kuidadu hodi hasa’e produtividade”, nia hato’o.
Iha fatin hanesan reprezentante Administradór postu Uatulari, Tomas da Silva, haktuir, sasán ne’ebé KHK fó la’ós sai oportunidade, maibé uza oportunidade sira-ne’e hodi nesesita ba moris no hadi’a ekonómia uma laran.
“Ita husu Governu no ONG sira nafatin fó apoia ba grupu sira, atu sira bele fó fali rezultadu pozitivu ba sosiadade tomak. Tanba grupu sira-ne’e bainhira susesu bele motiva fali komunidade seluk hodi envolve an iha setór agrikultura. Ohin loron ema hotu la interese ba atividade sira hanesan kuda modo halo toos tanba sira la kbiit hodi sasán sira tanba husi apoia sira ha’u fiar sei motiva di’ak liután ita-nia kominudade sira”, Nia enkoraja.
Entretantu, Reprezentante Grupu Uasufa, Martino Pereira Menezes, agradese ba KHK ne’ebé tulun ona grupu sira hodi fó solusaun ba problema ne’ebé enfrenta liuliu bee hosi bele uza ba rega modo.
“Ami agradese ba KHK ne’ebé hanoin ami, ajuda sasán bee nian ba ami, hodi ami bele uza ba nesesidade. Daudaun ne’e ami-nia modo kuda ona besik ektre ida, dezafiu mak bee, maibé ami ohin simu ona materiál. Ami sei esforsu hakarak kuda nafatin modo hodi sustenta ba ami-nia moris”. nia akresenta.
Tuir atividade grupu benifisiária sira hanesan Grupu Lemorai ho atividade foku kuda modo ho totál membru na’in-30, enkuantu Grupu Hakbi’it Família atividade integradu kompostu husi ortikultura kuda modo ektare ida, peskas haki’ak iha kolam rua ho medida 8×12 no pekuária hakiak manu, fahi no rai no impresta osan ho totál membru 32 ne’ebé ativa iha grupu.
Iha serimónia entrega materiál ne’e hetan partisipa husi xefe suku Uaitame, reprezentante xefe suku Matahoi, xefe aldeia, Koordenadór Extensionista postu Uatulari no hetan partisipa maximu husi membru Grupu Lemorai no Grupu Hakbi’it Familía.
Jornalista: Vitorino Lopes da Costa
Editór : Florencio Miranda Ximenes
