DILI, 26 jullu 2024 (TATOLI)–Membru Parlamentu Nasionál (PN) liuhusi Deputadu bankada CNRT, Natalino dos Santos, rekomenda ba mídia estatál TATOLI atu garante kualidade informasaun no tenke halo balansu informasaun.
Notísia Relevante: PR Horta husu TATOLI hala’o servisu jornalizmu ho imparsiál
“Rekomenda atu TATOLI fó sai informasaun kualidade liután. Dahuluk mak tenke halo balansu informasaun. Se ita-boot sira hetan fonte informasaun ida, ita-boot sira tenke buka fila-fali kontra informasaun sira-ne’e. Ezemplu, fonte A hateten informasaun ida, ita-boot sira foti tenke konfirma ho ema-ne’ebé mak deklarante sira para depois iha kualidade,” nia hato’o asuntu relasiona ho aniversáriu Agência TATOLI, I.P ba da-ualu ne’ebé kada tinans elebra iha loron 27 jullu.
Mídia estatál TATOLI tenke sai mídia investigativu no halo analize profundu tuir profisaun jornalista nian katak, mídia ne’e independente, imparsiál no mídia ne’e la haree ba kór no família, tanba mídia ne’e transforma informasaun tuir papél jornalista nian.
Deputadu husi bankada Governu ne’e apresia no kongratula ba aniversáriu mídia TATOLI ne’ebé durante ne’e sai fonte komunikasaun sosiál hodi habelar informasaun husi ukun-na’in sira ba baze no husi baze bele mai leten, hodi halo artikulasaun ba prosesu polítiku, ekonómiku no sosiál ne’ebé iha Timor-Leste.
“Ha’u fó parabens ba TATOLI ho nia dirijente no funsionáriu tomak, apresiasaun ba esforsu no kontribuisaun ba dezemvolvimentu demokrásia iha ita-nia rain,” nia dehan.
Tanba ne’e, nia enkoraja atu sai nafatin fonte importante ba informasaun ne’ebé importante tebes atu transforma informasaun sira ba sidadaun liuliu Estdu ida-ne’e bele hato’o informasaun liga ba povu nia moris ho vida Estadu nian la’o iha nasaun demokrátiku.
Membru PN ne’e husu nafatin atu hala’o knaar ho imparsiál, independente no labele monu ba polítiku sira.
“Husu hadi’a no tenke simu krítika konstrutivu. Dalaruma iha fallansu hanesan erru tékniku husi jornalista sira balun, dadus balun kontroversiál maibé ida-ne’e la’ós sai dezáfiu. Ida -e’e sai krítika ida hodi bele sai referénsia ba mídia ne’e, hodi la’o ba oin no haburas nafatin demokrásia hodi ka’er nafatin prinsípiu demokrátiku iha Estadu direitu demokrátiku,” nia hateten.
Deputada PD, Maria Teresa Gusmão, apresia notísia ne’ebé durante ne’e TATOLI publika ne’e mesak notísia ne’ebé iha kualidade tanba atualiza beibeik notísia atuál.
“Lori bankada PD nia naran, apresia tebes ba Agência TATOLI ne’ebé durante ne’e hala’o serbisu oferese notísia kualidade ba ita-nia populasaun. Espera, serbisu di’ak nafatin no fó notísia ne’ebé kualidade tuir lia-loos, kredível hodi bele ajuda mós ita-nia povu akompaña ita-nia governasaun no Estadu,” nia dehan.
Deputadu FRETLIN, Antoninho Bianco, hateten TATOLI fó sai informasaun kualidade ba populasaun no ba oin tenke halo di’ak liután liuhusi nia programa sira-ne’ebé di’ak hodi fó sai informasaun, nune’e TATOLI bele sai di’ak-liu mídia hotu-hotu, tanba TATOLI harii atu hato’o fonte informasaun ne’ebé kualidade.
“Ha’u-nia parabéns ba TATOLI, ne’ebé durante ne’e hala’o serbisu ho esforsu la’o ho limitasaun ne’ebé iha maibé bele halo ona serbisu. Ita hein katak, investimentu Governu nian hodi hasa’e kualidade prestasaun serbisu husi TATOLI ba Timor laran tomak no mundu kona-ba imajen Timor-Leste nian,” nia hateten.
Notísia Relevante: Taur husu TATOLI tenke mellora servisu jornalizmu hodi kontribui ba dezenvolvimentu
Jornalista : Nelson de Sousa
Editór : Cancio Ximenes
