Timoroan presiza kontribui pás iha komemorasaun Konsulta Populár-Vizita Papa Francisco
DILI, 26 jullu 2024 (TATOLI)—Membru Parlamentu Nasionál (PN) liuhusi Deputadu PD, António da Conceição “Kalohan”, husu timoroan hotu atu kontribui ba pás no estabilidade iha ámbitu komemorasaun loron Konsulta Populár ba da-25 (30 agostu 1999-30 agostu 2024) no Papa Francisco hala’o vizita Estadu ho pastorál iha Timor-Leste.
Nia dehan, rona grupu movimentu barak ne’ebé mós ho orientasaun situasaun inseguransa iha rai-laran, hanoin importante mós tenke hahú kria ambiente ne’ebé mak seguru, tanba Timor-Leste hasoru situasaun importante komemorasaun loron konsulta populár no vizita Amu Papa ninian ne’ebé mós atu mai.
“Entaun, ita hotu-hotu tenke kria kondisaun no ambiente ida-ne’ebé mak favorável, nune’e fó imajen ida ba ita katak ita garante hela estabilidade iha ita-nia rain. Konvidadu sira-ne’ebé atu mai partisipa iha serimónia sira-ne’ebé ita atu hala’o iha agostu nia laran, no serimónia boot Amu Papa ninian ne’ebé mak atu mai. Amu Papa sei halo misa iha Tasi-Tolu ne’e, ema hotu-hotu sente seguru atu ba partisipa,” Deputadu António da Conceição hato’o iha uma fukun Parlamentu Nasionál.
Tanba ne’e, nafatin husu ba PNTL no louva sira nafatin hala’o serbisu loron no kalan hamutuk ho F-FDTL ne’ebé halo daudaun akordu sira bele halo kontrolu ida konjunta.
Situasaun ida-ne’e tenke ezije timoroan sira-nia responsabilidade hodi bele kontribui ne’e importante tebes ba sidadaun hotu ba Timor-Leste ida-ne’ebé agora kememora tinan 25 konsulta popular ne’e, timoroan sira tenke prova nia maturidade hanesan nasaun.
Deputadu CNRT, Duarte Nunes, hateten 30 agostu ne’e nu’udar loron konsulta populár tenke komemora nafatin ho dimensaun ida boot, hodi fó mensajen ba joven sira atu hatene saida mak loron konsulta popular, tanba loron ne’e momentu istóriku tebes iha momentu ne’eba povu hotu hamriik foti desizaun hodi hetan vitória ba ukun-rasik aan.
Jornalista : Nelson de Sousa
Editór : Cancio Ximenes
