Autoridade Marítima Nasionál iha hela faze konsolidasaun insititusionál
DILI, 27 jullu 2024 (TATOLI) – Ministru Defeza, Kontra Almirante Donanciano Costa Gomes Pedro Klamar Fuik, hateten Autoridade Marítima Nasionál (AMN) sei iha hela faze konsolidasaun institusionál molok hala’o nia kna’ar ho efetivu.
“Sira iha faze konsolidasaun organizasaun, estabelese organizasaun iha autoridade ne’ebé hateten autoridade ne’ebé mak multi-setorál no multi-displiñar, la’ós fasil ba sira halo buat hotu, entermus enkudramentu legal, preparasaun rekursu umanu, estrutura organizasionál. Sira iha servisu barak ne’ebé iha dalan di’ak, sedu no tarde, instituisaun Estadu ida-ne’e sei operasionaliza tuir misaun ne’ebé mak atribui ba nia”, Pedro Klamar Fuik, dehan hafoin vizita ba edifísiu Autoridade Marítima Nasionál, sábadu ne’e.
Nia esplika, Autoridade Marítima sai hanesan autoridade nasionál ne’ebé mak Estadu estabelese hodi fiskaliza no kontrola espasu marítima nasionál.
“Autoridade Marítima Nasionál hanesan ita boot sira hatene katak entidade ida ne’ebé mak reune setór barak ne’ebé mak iha atividade multi-displiñar, entaun tuir ita-nia definisaun katak autoridade ida-ne’e koordenasaun ho ita-nia militár”, nia adianta.
Nia dehan, estruturamente Autoridade Nasionál Marítima, responsavél husi Xefe Estadu Maiór Jenerál no komanda husi komandante komponente navál ne’ebé mak sai hanesan diretór jerál hodi responsavel ba atividade Autoridade Marítima Nasionál.
“Autoridade Marítima Nasionál sei reune organizasaun liña ministeriál sira ne’ebé iha responsablidade ba tasi para ita-nia Autoridade Marítima Nasionál ne’e halo nia kna’ar oinsá mak kontrola no fiskaliza ba ita-nia tasi ne’ebé sai hanesan espasu soberania nasionál”, nia afirma.
Governante ne’e rekoñese, Autoridade Nasionál Marítima seidauk iha espasu própriu tanba sei aluga hela edifísiu balun, maibé liuhusi vizita ida-ne’e Governu sei haree hodi bele tulun sira, hodi buka rai atu bele instala futuru edifísiu ba Autoridade Nasionál hodi bele halo sira servisu ho di’ak liután.
“Se ita bo’ot sira haree fatin ida-ne’e la’os própriu, tanba ita seidauk iha duni fatin própriu ba sira, maibé fó tempu ba ita-nia Governu hodi haree para fó fatin ida própriu. Ha’u rona saida mak sira hato’o mai ha’u no ho vizita sira hanesan ne’e hodi haree situasaun real sira instituisaun nian”, nia dehan.
Iha fatin hanesan, Diretór Jerál Autoridade Marítima Nasionál Komodoro, Higinio das Neves hateten, vizita ida-ne’e Ministru Defeza halo ba Autoridade Nasionál no pozitivu tebes.
“Vizita ida-ne’e pozitivu liu tanba sua eselénsia bele vizita ami hodi bele hatene ami-nia difikuldade saida mak ami halo daudaun, hahú husi jullu, nia simu mandatu hanesan Ministru Defeza to’o momentu ida-ne’e”, nia subliña.
Nia dehan, iha ámbitu vizita ne’e, Komodoro Neves aprezenta planu no orsamentu Autoridade Marítima Nasionál 2025, atu Governu bele aseita hodi Autoridade Marítma Nasionál bele ativa nia atividade.
Komodoro Neves hateten, Autoridade Marítima seidauk bele halo nia funsaun ho efetivu tanba sei prepara regulamentu balun oinsá mak kapitaun ró uza hodi bele fó orden ba nia elementu sira ne’ebé servisu ho nia atu prende ró, kontrola ró, fiskaliza ró no oinsá organiza ró para no atu sai.
Neves hateten, Autoridade Marítima Nasionál sei iha faze konsolidasaun institusaun, hanesan instala estrutura, kompleta fasilidade sira hanesan mobiliáriu atu priénse hanesan meza kadeira, no sasan sira seluk.
“Ami sei tau ró bote rua iha tasi ibun no mós sei koloka forsa fuzileiru sira iha tasi atu bele servisu ho Unidade Polísia Marítima hodi responde ba situasaun ruma hanesan ita-nia sidadaun sira mout, ita bele ajuda no iha buat ruma entaun ita bele halo fiskalizasaum ba área sira ne’ebé iha”, nia afirma.
Nia mensiona, Autoridade Marítima Nasionál koloka nia ema adjuntu kapitaun ida iha Tibar no ida iha Naval Hera.
“Iha vizita ne’e, Ministru Defeza fó orientasaun para ami kontinua re-organiza aan hodi koordena ho ministériu sira seluk hodi bele hola parte iha Aurtoridade Marítima Nasional para bele halo servisu ho di’ak.
Jornalista: Natalino Costa
Editór : Zezito Silva
