Akontese hostia raan iha ibun, hein prosesu identifikasaun
VIQUEQUE, 27 jullu 2024 (TATOLI)-Padre Vigário Nossa Senhora de Fátima, parókia Uatolari, munisípiu Viqueque, Heriberto Soares Pedro, hateten, akontesementu sarani ne’ebé simu hostia mosu raan nakonu ibun-laran iha igreja párokia postu Uatulari, munisípiu Viqueque.
“Loos duni ida-ne’e akontese iha igreja Nossa Senhora de Fátima bainhira ha’u halo misa hela ba matebian Ana Maria isin mate, depois misa la’o, ha’u mak fó komunga ba sarani sira; hotu tiha, ha’u ba fali altar hamoos hela kalis mak mana Tina hakilar dehan ha’u-nia ibun laran raan. Nune’e ha’u tuun halo hakalma tiha no ha’u haruka sira halo orasaun. Maibé sinál saida loos ita seidauk hatene loloos “, Pe. Heriberto Soares Pedro, hateten ba Agência Tatoli, via telefónika, ohin.
Amu Heriberto hatutan, evidénsia raan daudauk ne’e rekolla ona hodi sai evidénsia ba prosesu identifikasaun kauza raan referida.
“Nune’e ha’u haruka mana Tina tafui tiha raan hodi sai hanesan evidénsia. Aban maka dioseze kontinua halo komfirmasaun kle’an,” Pe. Heriberto adianta.
Tuir kronólojia, nia konta misa ba matebian ba Ana Maria husi aldeia Uaniuma, suku Matahoi, akontesementu ne’e maizumenus 5h45 lorokraik, misa la’o baibain, fahe tiha hostia hotu maka mosu raan iha sarani Tina nian ibun.
“Nune’e ha’u fila ba altar hodi hamoos hela kalis, mak derrepenti mana Tina hakilar dehan hostia raan iha ha’u-nia ibun, milagre saida karik no hakilar buat oi-oin. Ha’u tuun ba hodi hakalma tiha, nune’e ha’u dehan ba sira di’ak liu imi hakmatek. Raan ne’e sai evidénsia ne’ebé ha’u foti ona rai hela iha parókia no ha’u informa ona ba deose, vigáriu no amu bispu. Aban maka ita foin haree loloos, hodi klarifika. Raan ne’e milagre ka la milagre ne’e aban maka ita foin hatene tanba ne’e sei iha prosesu naruk”, nia subliña.
Tanba ne’e saserdote ne’e afirma katak akontesementu ne’e loos, maibé prosesu ba identifikasaun ne’ebé atu klaru ne’e milagre ka la milagre seidauk loos.
“Ida-ne’e Jesus nia isin maka nakfila ba raan, Jesus nian raan duni ka lae ita seidauk bele hatene. Tanbe ne’e sei liuhusi prosesu, ha’u rasik mós seidauk hatene ne’e sei liuhusi bispu no vatikanu mak bele foti desizaun ba ida-ne’e,” Nai-lulik ne’e konfirma.
Jornalista: Vitorino Lopes da Costa Editór: Rafael Ximenes de A. Belo
