MAPPF oferese kombustivél hodi fila-rai ba agrikultór Viqueque
DILI, 29 jullu 2024 (TATOLI)- Xefe Departamenu Programa Extensaun Agrikultura Munisípu Viqueque, Agostinho Pinto Mascarinhas, hateten, Ministériu sei distribui kombustivél hamutuk tonelada lima ba munisípiu Viqueque hodi apoia povu agrikultór ne’ebe halo toos no natar liuliu fila sira nia-rai .
“Foin lalais ne’e ministeriu aloka ona kombustivél hamutuk tonelada lima ne’ebé ami uza ba tratór hodi ajuda fila ita-nia agrikultór sira-nia rai. Daudaun ne’e hahú fila rai iha postu Viqueque Vila, ne’ebé antes ne’e ita-nia agrikultór sira halo pedidu mai servisu agrikultura Viqueque”, Xefe Departamenu ne’e hateten ba jornalista Agência TATOLI, via telefónika, ohin.
Daudaun ne’e, Servisu Agrikultura Munisípiu Viqueque destaka ona tratór boot unidade lima hodi apoia agrikultór sira husi suku tolu hanesan suku Uaimori, Caraubalo no suku Luca.
Alokasaun tratór boot apoia fila agrikultór sira-nia rai ba kada suku tolu ne’e suku Caraubalu tratór boot ida, suku Luca tratór ida no suku Uaimori tratór boot tolu. Bazeia ba pedidu fila rai ne’e, sei fila rai totál ektare 22.
“Tanba ne’e kombustivél iha tarjetu ba fila rai ema kbi’it la’ek sira, maibé ba funsionáriu no veteranu sira labele tanba ita-nia kombustivel la sufisiente. Tanba ne’e karik funsionáriu, veteranu no grupu sira hakarak husu apoia tratór bo’ot atu ba fila-rai, bele ba maibe presiza responsavél kombustivél, depois ami aloka tratór ba”, nia haktuir.
Agrikultór sira husi postu Viqueque Vila bainhira fila-rai hotu sei kontinua destaka ba postu sira hanesan Lacluta, Ossú, Uatulari no Uatucarbau. Maibé kritéria maka agrukultór sira husi kada postu maka haruka pedidu ba Servisu Agrikultra Munisípiu Viqueque, to’o tenke iha lutu di’ak no ema servisu hafoin aloka tratór bo’ot.
“Agrikultór sira tenke prense kritériu foin ami koloka tratór ba, depois fila hotu agrikultór sira tenke pratika di’ak. kada tinan ami apoia tratór fila rai ne’e kada uma-kain ida ektare ida, tuir forsa ne’ebé sira iha”, nia afirma.
Tuir dadús tratór boot iha servisu agrikultura munisípiu Vqueque unidade 39, unidade 6 halo lelaun, trator kondisaun a‘at naton 14, aat todan 12 no kondisaun di‘ak haat no foun unidade haat.
Jornalista: Vitorino Lopes da Costa
Editór : Florencio Miranda Ximenes
