DILI, 29 jullu 2024 (TATOLI)–Ministériu Edukasaun (ME) koordena ho dirijente no inspetór eskolár sira husi munisípiu hotu ba preparasaun koloka profesór faze daruak.
“Ami mós sei haree kolokasaun ne’e bazeia ba pedidu ka nesesidade husi munisípiu sira atu haree depois ita koloka. Tanba ne’e, ita tenke serbisu hamutuk ho diretór sira tanba sira mak iha terrenu, entaun sira mak idenfika no hatene didi’ak nesesidade iha eskola sira ne’ebé presiza duni manorin bazeia ba kuadru pesoál ne’ebé iha,” Diretora Rekursu Umanu iha ME, Anita Tavares de Jesus, informa ba Agência Tatoli, iha ninia knaar fatin, Villa-Verde, segunda ne’e.
ME iha ona kuadru pesoál atu koloka tuir maibé la’ós husi nasionál de’it tanba kolokasaun ne’e bele mós la to’o, tanba ne’e tenke rona mós dirijente sira husi munisípiu, nune’e bele koloka tuir nesesidade.
Notísia relevante : Aplikante 2.442 pasa iha teste bolsa kandidatu profesór faze daruak
ME hakarak profesór sira tenke hela iha fatin seguru tanba iha kolokasaun iha faze dahuluk iha profesora balun halo reklamasaun tanba inan isin-rua inklui oan kiikoan no la besik sentru saúde sira.
“Entaun agora ne’e ita sei haree no razaun sira ne’e pertinente duni no ita tetu hodi ita rekoloka fali,” nia akresenta.
Daudaun iha hela faze publika sai lista rezultadu, ne’ebé fó sai ne’e durante loron-lima, hahú husi ohin to’o iha sesta semana ne’e,
“Ita-nia kandidatu sira bele haree sira-nia naran iha pájina ME. Nune’e, sira bele halo reklamasaun tanba tuir lei katak ita fó oportunidade ba sira atubele halo ninia reklamasaun karik iha buat ruma. Tanba seriasaun ne’e bazeia ba sira-nia nota, pontuasaun nomós bazeia ba idade,” nia dehan.
Bainhira liu tiha loron-lima, ME mós sei halo prosesu tuir faze omologa hafoin halo notifikasaun ba aplikante vaga ne’ebé previstu.
“Ida-ne’e ita sei bolu fazeadamente. Ita sei bolu uluk bazeia ba lista seriasaun ne’e atubele koloka. Ne’ebé urjentemente ita sei koloka iha fulan-agostu nia laran,” nia tenik.
Jornalista : Osória Marques
Editora : Julia Chatarina
